थ्व मिखा दयाः स्वइच्वनेमाःगु स्वय्गु छगू नं भार जुल ।
– शशिकला मानन्धर
नातिदाइ म्हं मफु, वीर अस्पतालया आइसियू वार्डय् दु धकाः संगीतकार मनराजा नकःमिं सूचं बीवं जि ब्वाँय् अस्पताल वनाः स्वःवा । बेडय् ग्वारातुलाच्वंम्ह नातिदाइ नं खँ ल्हाय्फुनि । सः धाःसा त्यामजी । सलाइन बियातःगु ल्हाः ल्ह्वनाः छु छु धाल, व जिं मथू । लिपातय् वय्कःया तिरिमय्जु प्रमिला तता नं वार्डय् दुहां झाल । नातिदाइया खँ ततां जक थुल । नातिदाइ नं ल्हातय् च्वंगु सलाइनया मुलु लिकाना ब्यु धाःगु खनि । गुलि स्याः जुइ धकाः मनय् वन । नर्स वल, वं ला नातिदाइयात हेय्काः छु छु धाल, नातिदाइ सुम्क च्वन । ‘नातिदाइया उसाँय् बुलुहुँ बांलाना
वइ, अलय् नर्सं थ्व मुलु लिकयाबी ।’ जिं नातिदाइयात ल्हाः ज्वनाः धया ।
नातिदाइ नं ‘दय्’ धाःगुथें च्वं, जि वार्डं पिहां वया । तर छवाःया दुने हे नातिदाइया उसाँय् स्यनावन खना, मृत्युनाप संघर्ष यानाच्वंम्ह नातिदाइ बुत खनी । वंगु पुष १९ गते विहिवाः सुथय् ‘नातिदाइ मन्त ।’ धकाः बाखं च्वमि भरत साःमि व मनराजा नकःमि निम्हेस्यां नापनापं फोनं सूचं बिल । ११ताः इलय् हे जि दगू बहालय् वना । दगू बहाः, गन नातिदाइया बाखं, चिनाखँ गोष्ठि जुइगु खः, गन नातिदाइया म्येचाः, सफू विमोचन ज्याझ्वः जुइगु खः, व थासय् नातिदाइ मिखा तिस्सिनाः द्यनाच्वन ।
नातिदाइया म्हय् खादा छपु छाना । नमस्ते यानाः थुखे वयाबलय् मनय् वन, आः थ्व दगू बहालय् सुनां बाखं, चिनाखं गोष्ठि याइ ? सुनां म्येचाः व सफू विमोचन ज्याझ्वः याइ ? लिसः लुइके मफुत जिं । मिखाय् सर्रर ख्वबि जायावल ।
थनिं दच्छिति न्ह्यः नेवाः एफ.एम.य् ‘च्वसाया सः’ साहित्यिक ज्याझ्वलय् कवि, म्येच्वमिकथं जिं नातिदाइयात न्ह्यब्वयागु खः । व इलय् फोनं न्यागू मिनेट नातिदाइनाप खँ नं ल्हाय्गु मत्तिइ । तर वय्कः ला खातां दनाः कोथाय् छकुनय् दुगु फोन दुथाय् तक हे वनेमफु खनी । फोनं खँ ल्हाय्गु मिले मजुल । लिपा सिल, नातिदाइ कोथा पिनेसं दुगु ट्वाइलेटय् नं वनेमफु खनी । दक्व सेवा प्रमिला ततां याय्माः खनी, खँ न्यनाः जि स्तब्ध जुल, नातिदाइ नं गुलि कष्टमय जीवन हनाच्वन खनी । प्रमिला ततायाके दुगु सेवाभाव खनाः नुगः खुल्ल मिन । थथे सेवा याय्माःगु प्यदँ दय्धुंकल खनी ।
कवि व म्येच्वमि नातिबज्र बज्राचार्य, वय्कःया चिनाखँ सफू ‘सुतिलः’, ‘जीवनया दुवातय्’ व ‘थःम्हं थःत लुइकाबलय्’ मुक्कं स्वंगू पिदंगु दुसा ‘जि हेरा’ मचाम्ये सफू नं पिदंगु दु । अथे हे ‘स्वय्नगु’, ‘तय्जु’ व ‘छ्यनय् तकुस्वां’ यानाः मुक्कं स्वचाः म्येचाः नं पिदंगु दु ।
वय्कःया तःपु चिनाखँ नेवाः एफ.एम.य् बाचन यानागु दु, उकी मध्ये छुं छुं चिनाखँ थन न्ह्यब्वयाच्वना ।
१. ख्वबि
ख्वबि
मसि खः
कविताया ।
नुगः
च्वसा खः
कविताया ।
थ्व सर्गः
थ्व पाःताः
भ्वं खः
कविताया ।
२. कविता
कविता कविया छुं मखु
‘जिं जिगु’या किचः जक
छु याय् छु याय्या
खुसिबाः वय्वं
चिच्चादंगु भाव जक
३. जीवनया लँपुइ
भुतूला मसां खनी
न्हिंन्हिं थः हे सिनाः च्याकेमाःगु
जीवन ला अगिंमथः खनी
गुनुँहुँ न्ह्याबलें च्याय्माःगु ।
वय्कःया च्वसां पिज्वःगु थीथी म्ये नेवाः एफ.एम.य् जक मखु, न्हापा ‘स्वनिगः सच्छि एफ.एम.’ व ‘मेट्रो एफ.एम.’य् नं हाय्के नं, उकी मध्ये ‘थ्व मिखा दयाः स्वइच्वनेमाःगु, स्वय्गु छगू नं भार जुल’ म्ये हालादीम्ह जुजुकाजी रञ्जित, अलय् संगीतकार खः सुुरेशमान श्रेष्ठ । ‘स्वय्नगु’ म्येचाकय् दुथ्याःगु दकलय् अप्वः हाय्कागु लुमं ।
नातिबज्रदाइ कवि व म्येच्वमि जक मखुसे असं, दगू बहाः दुहांवनेगु गल्ली सफूधुकू चाय्काच्वंम्ह सफू मीम्ह बन्जाः नं खः । उलिजक नं मखु, न्हापा न्हापा थीथी थासय् बां व चिनाखँ गोष्ठि याइम्ह ग्वसाः खलःया नायः नं खः । व इलय् जिं नं तःक्वः बाखं ब्वनागु दु । अलय् वय्कःया सफूधुकू भाषा ख्यःया मनूत नापलाय्गु छगू ‘मिटिङ्ग हल’ खः । पौ व च्वसु कालबिल याय्गु ‘पोष्ट अफिस’ नं खः ।
सुंयात पौ वा च्वसु बीमाःसा वा काय्माःसा अप्वःस्यां ‘नातिदाइया पसलय् बियाति’ धाइ । जि ३२÷३३ सालपाखे नकतिनि नकतिनि भाषा ख्यलय् वयागु इलय् नातिदाइ नं ख्याः यानाः जितः ‘शशिकला दिदी’ धकाः सम्बोधन यानादी । उबलय् जिं नं ख्याः यानाः ‘नाति बाज्या’ धाय्गु । लिसलय् वय्कः हिँ हिँ.... सः वय्कः न्हिलादी । लिपातिनि जितः ‘शशिकला’ जक धाय्गु यानादिल । अलय् जिं नं ‘बाज्या’ मधासे ‘नाति दाइ’ जक धाय्गु याना ।
छगू पुलांगु खँ लुमन, अथे हे ०४५÷४६ सालपाखे नातिदाइया छेँय् मातं कोथाय् मस्त मुनाः म्येया रिहर्सल यानाच्वंगु, म्ये हालेगु स्यनाच्वंम्ह न्ह्यू बज्राचार्य । झी दुर्गालाल श्रेष्ठया च्वसां पिज्वःगु मचा म्येचाः ‘चुलिंचिया चंचं’ पिकाय्त्यंगु । उबलय् नातिदाइयात मानेयाना जिं । थःगु कोथाय् म्येया रिहर्सल याकेबलय् गुलि डिस्टर्ब जुइ, गुलि थःगु ज्याखँ पाइ ? तर नातिदाइ नं भचा हे उसिँमचासे दक्वसित नकेत्वंके यानाच्वंगु, दक्व जोरजाम यानाच्वंगु खनाबलय् अजू चाल जि । आः बिचाः याय्बलय् नातिदाइया म्ह्याय् नःलि बज्रचार्यं ‘जिमि बाः, नेपालभाषाया ज्यामि खः ।’ धाःगु पाय्छि ताल ।
नातिबज्र दाइ, एफ.एम. रेडियोलय् जिगु ज्याझ्वः न्यनीम्ह छम्ह ‘गुड लिस्नर’ खः, जिगु सःया प्रशंसक नं खः । थनिं नीदँ न्ह्यः वय्कःया याकः च्वसाय् सुरेशमान श्रेष्ठ (दनिबलय्)या याकः लसय् अले जुजुकाजी रञ्जितया याकः सलय् छगू म्येचाः पिदन, ‘स्वय्नगु’ । व म्येचाः बिमोचन ज्याझ्वः दगू बहालय् जूगु, अलय् उद्घोषण याय्गु भाला नातिदाइ नं जितः बियादिल ।
वयां लिपा थनिं स्वदँ न्ह्यः, वय्कःया याकः च्वसाय् मनराजा नकःमिया याकः लसय् थीथी म्येहालामिपिनिगु सलय् म्येचाः ‘छ्यनय् तकुस्वां’ पिदन । क्षेत्रपाटी पार्टी प्यालेसय् जूगु व म्येचाः बिमोचन ज्याझ्वलय् नं उद्घोषण याय्त नातिदाइ नं जितः हे लुमंकादिल । थथे लुमंकूगु नं जिगु नितिं छगू ‘गर्ब’या खँ खः । ग्वाहालि याय् दुगु नं जिगु लसता खः ।
अन्तय् धाय्, नातिदाइया च्वसां सिर्जना जूगु म्ये मध्ये जितः ‘थ्व मिखा दयाः स्वइच्वनेमाःगु, स्वय्गु छगू नं भार जुल’ म्ये छपु अतिकं यः । थुलि हे शब्द ह्वलाः कवि÷म्येच्वमि÷सफू बन्जाः नातिदाइप्रति श्रद्धाञ्जलि देछाय् ।
