दकलय् अप्वः ग्यसु दुम्ह क्रिकेट कासामि रकीम
लहना न्यूज | ने.सं. ११३९ ञलाथ्व पारु (३१ अगष्ट, २०१९), सञ्चरवाः
वेष्ट इण्डिजया रकीम कर्नवाल टेष्ट क्रिकेट म्हितूम्ह हलिंया हे दकलय् अप्वः ग्यसु दुम्ह कासामि जूगु दु । १४०गू केजीया रकीमं भारत विरुद्धया टेष्ट क्रिकेटय् डेब्यू यानाः हलिंया हे दकलय् अप्वः ग्यसु दुम्ह कासामिया रेकर्ड दयेकूगु दु ।
जमैकाया किङ्गस्टनया सविना पार्कय् म्हिगः शुक्रवाः न्ह्याःगु टेष्टय् रकीमं न्हापांगु दिनस वेष्ट इण्डिजया नितिं दकलय् अप्वः ओभर बलिङ्ग यात ।
थ्व स्वयां न्ह्यः दकलय् अप्वः ग्यसु दुम्ह कासामिया रेकर्ड अष्ट्रेलियाया वारविक आर्स्ट्रङ्गया नामय् दुगु खः । वय्कः क्रिकेट कासा म्हितूगु इलय् १३३गू निसें १३९गू केजीतक दुगु खः ।
अफ स्पीनर रकीमं भारतविरुद्धया डेब्यू कासाया न्हापांगु दिनस २७गू ओभर बलिङ याःगु इलय् ६९गू रन बियाः १गू विकेट कायेत ताःलाःगु खः । वय्कलं चेतेश्वर पुजारायात ६गू रनय् क्याच आउट याःगु खः ।
२६दँ दुम्ह रकीम लिपांगु इलय् स्पीन बलिङय् थःगु प्रभाव क्यनेवं राष्ट्रिय टिमय् लाःगु खः । ६गू फिट ६इन्च तःधिकःम्ह रकीमं विपक्षी ब्याट्सम्यानयात मछिंकथं वाउन्स बल वांछ्वइगु खः ।
घरेलु क्रिकेटय् सन् २०१४य् डेब्यू याःम्ह रकीमं ५५गू न्हापांगु श्रेणीया कासा म्हितूगु इलय् २६० विकेट काःगु खःसा २२२४ रन दयेकूगु खः । वय्कलं ५गू शतकतकं दयेकूगु खः ।
एन्टिगुआय् जन्म जूम्ह रकीमं भारत विरुद्धया न्हापांगु टेष्टय् धाःसा म्हिते मखंगु खः ।
थ्व स्वयां न्ह्यः सन् २०१६य् भारतं वेष्ट इण्डिज भ्रमण याःगु इलय् रकीमं वार्मअप कासाय् न्यागू विकेट काःगु खः । उगु इलय् वय्कलं विराट कोहली, अजिन्का राहाणे व पुराजयात आउट याःगु खः । अथेखःसां रकीम राष्ट्रिय टिमय् लायेत धाःसा ताःमलात ।
Categorized in कासा
