दक्षिण अफ्रिाकाया राष्ट्रपति सिरिल रामाफोसां थःगु देय् बिरुद्ध तःगु यात्रा प्रतिबन्धया कुँख्यनादीगु दु ।

दक्षिण अफ्रिाका लिसेंया मेगु ६ गू अफ्रिकी देशय् कोरोनाया न्हूगु भेरिएन्ट लुइधुंका हलिंया आपालं देशं यात्रा प्रतिबन्ध तयेधुंका असन्तुष्ट जुयादीम्ह राष्ट्रपति रामाफोसां थःगु देय् व नागरिकयात अन्याय जूगु प्रतिक्रिया बियादीगु दु ।

छगू समारोहस न्ववासें वयेकलं थी थी देयया थुगु निर्णयलं थःपिन्त निराश याःगु धका थःपिनि नागरिकया नुगः क्वन्ह्याकेगु ज्या जक जूगु धयादीगु खः । लिसें वयेकलं यात्रा प्रतिबन्धया छुं नं वैज्ञानिक लिधंसा मदूगु धका दक्षिण अफ्रिकी देय्त अनुचित यःमयःया शिकार जूगु धयादील ।

निवा न्ह्यः दक्षिण अफ्रिकाया दक्वःलय् अप्वः जनघनत्व दूगु गौतेङ प्रान्तय् न्हूगु भेरिएन्ट लुइधुंका बिश्व स्वास्थ्य संगठन डब्ल्युएचओं बिश्व जगतयात सचेत याकुगु खः ।

थ्वहे दथुइ डब्ल्युएचआें यात्रा प्रतिबन्ध तःगु देय्यात बैज्ञानिक दृष्टिकोणं निर्णय कायेत छ्याता बियादीगु दु । आः अमेरिका, बेलायत, युरोपियन युनिएन, नेपाल, भारत लिसेंया देय्तयेसं दक्षिण अफ्रिकी देय्या यात्रुतयेत प्रतिबन्ध तयेधुंकुगु दु ।

Categorized in अन्तर्राष्ट्रिय