दक्षिण कोरियाय् राष्ट्रपति मुनया पार्टीयात बहुमत
लहना न्यूज | ने.सं. ११४० चौलागा नवमि (१६ अप्रिल २०२०), विहिवाः
कोरोना भाइरस (कोभिड–१९)या प्रकोप दथुइ दक्षिण कोरियाय् जूगु संसदीय चुनावय् राष्ट्रपति मुन जाए इनया पार्टी त्याःगु दु ।
कोरोना भाइरसया प्रकोप शुरु जुइधुंकाः थुखे आम निर्वाचन याःगु दक्षिण कोरिया न्हापांगु देय् खः । कडा सुरक्षा व सामाजिक दूरी कायम यासें क्वचाःगु चुनावय् २८दँ थुखे दकलय् अप्वः मतदान जूगु कोरिया हेराल्डं न्ह्यथंगु दु ।
मतगणनाया अन्तिम चरणय् थ्यंगु इलय् सत्तारुढ डेमोक्रेटिक पार्टीं स्वसःगु सीट मध्ये १६३गू सीट त्याःगु बिबिसीं न्ह्यथंगु दु । गठबन्धनय् दुगु मेगु प्लाटफर्म पार्टीं १७गू सीट व डेमोक्रेटिक पार्र्टीं १८०गू सीटलिसें सरकार दयेकीगु सम्भावना दुगु अन्तर्राष्ट्रिय सञ्चारमाध्यमं न्ह्यथंगु दु ।
कोरोना भाइरस विरुद्धया ल्वापुइ प्रभावकारी पलाः ल्ह्वंगुलिं राष्ट्रपति मुनया पार्टी त्याःगु विश्लेषकतसें दाबी याःगु दु ।
बिबिसीया सोल सम्बाददाता लाउरा विकरयाकथं जनवरीइ राष्ट्रपति मुनया पार्टीयात कयाः जनसमर्थन तसकं म्हो जक दुगु खः । दक्षिण कोरियाली अर्थतन्त्र कुहां वनाच्वंगु, उत्तर कोरियालिसेया वार्ता ताःमलाःगु व थीथी राजनीतिक काण्डं मुनया पार्टीया लोकप्रियता कुहांवःगु लाउराया विश्लेषण दु । तर कोरोना भाइरस विरुद्धया ल्वापुइ आक्रामक रणनीतिलिसें प्रभावकारी पलाः न्ह्याकेधुंकाः मुनया लोकप्रियता हाकनं च्वन्ह्याःगु खः ।
ट्रेसिङ, ट्रायकिङ व परीक्षणय् आक्रामक ढंगं न्ह्याःवंगुलिं न्हियांन्हिथं च्यासःम्हतक संक्रमण जूगु अवस्थाय् थौंकन्हय् सरकारं स्वीम्हय् थ्यंकूगु दु ।
थुगु चुनाव त्यायेधुंकाः डेमोक्रेटिक पार्टीं सन् १९८७ स कोरियाय् प्रजातान्त्रिक चुनाव लिपा दकलय् तःधंगु बहुमतया सरकार दयेकीगु जूगु दु ।
Categorized in अन्तर्राष्ट्रिय
