दक्षिण यलया स्याःचाः
लहानान्युज | अनलागा २ ११४०,असोज १७ सनिवाः
यल धयाकथं आपाःसिनं जावलाखेल, कुपन्द्वः, लगंख्यः मंगलबजार जक लुमंकी, तर, यल दक्षिण दुर्गम पहाडी भेगया व्यथा मेगु हे दु । थुगु लागाया विकासय् सुनां च्यूताः मतःबलय् दक्षिण यलया अवस्था राजधानीं अतिकं तापाःगु दुर्गम गां थें जुयाच्वंगु दु ।
निवाः न्ह्यः वागमती गाउँपालिका–७ गिम्दीया ६५दँया ठूलीमाया नेगीया म्हय् आकाझाकां रक्त सञ्चार बांलाक मजुल । वय्कःयात अस्पताल यंकेत स्वःबलय् मदिक्क वयाच्वंगु वाया हुनिं बगुवा–प्युटार–आश्राङ–गिम्दी सडकय् थाय्थासय् चलः कुतुंवयाच्वंगु हुनिं एम्बुलेन्स गिम्दीतक्क थ्यनेमफुत ।नेगीया काय् राजेशं महाँकाल गाउँपालिकापाखें तच्वःगु धेबा पुलाः एम्बुलेन्स ला सःतल । तर, कान्तिलोक पथय् वंगु चलःया हुनिं सडक अवरुद्ध जूबलय् इलय् अस्पताल थ्यकेमफुत । गिम्दीं कान्तिलोक पथ जुयाः टिकाभैरवस्थित आनन्दवन अस्पताल ३० किमी तापाः ।
तर, नेगी ठूलादुर्लुङ–गोटिखेल चाःहिलेमाःबलय् अस्पताल थ्यनेत ५० किमी अप्वः यात्रा याय्माल । वय्कः थाकूगु यात्रा यानाः बल्लतल्ल अस्पताल ला थ्यन, अन चिकित्सकतय्सं स्वास्थ्यस्थिति जटिल जुयावंगु धकाः पाटन अस्पताल रिफर यानाबिल । पाटनय् छवाः वासः यानाःलि शुक्रबाः वय्कः डिस्चार्ज जुल । तर, छेँय् वनेमखंनि । कारण, चलःया हुनिं अवरुद्ध कान्तिलोक पथ अझंमचाःनि । आः वय्कः चापागाउँ टाखेलस्थित केहेँया म्ह्याय्याथाय् च्वनेत बाध्य जुयाच्वंगु दु ।
गिम्दीया हे ५५दँया तारा स्याङतानयात तुतिया समस्या दु । वय्कःया म्ह्याय् सुनिताया कथं मांयात पाटन अस्पतालमा निलाय् छकः धइथें चेकअप याके यंकेमाः । तर, कान्तिलोक पथय् वंगु चलःया हे हुनिं अस्पताल थ्यनेमफयाच्वंगु वय्कलं धयादी।
थ्व ला छुं प्रतिनिधि पात्र जक खः । हेटौंडायात येँय् स्वाइगु लोकमार्ग कान्तिलोक पथय् थाय्थासय् वंगु चलः सम्बन्धित निकायं चीकेत इलय् हे च्युताः मक्यंबलय् दक्षिण यलया स्थानीयबासीयात समस्या जूगु दु । दक्षिणबासीं चलः चीकेत तारन्ताः कान्तिलोक पथ योजना, यलया प्रमुख जिल्ला अधिकारी लिसेंयात ध्यानआर्कषण याकल । तर, सुनां च्यूताः मब्यू । अति हे जुसेंलि शुक्रबाः सांसद लिसेंया टोली योजनाय् डेलिगेसन हे वन । उमिसं योजना प्रमुखयात चलः मचीकूबलय् एम्बुलेन्स थुज्वःगु अत्यावश्यक सवारी ज्वलं ठप्प जूगु व विरामीया अकालय् हे सीगु सम्भावना अप्वःगु अले १० लाख ज्वलिंज्वःया दुरु सितिं वंगु धासें ध्यानार्कषण याकल ।
सांसद चेतनाथ सञ्जेलं कान्तिलोक पथ विस्तार यानाः कालोपत्रे याय्त ठेक्कापट्टा जुइधुंकूगु व योजनाया इन्जिनियरं याःगु इस्टिमेट कथं भुक्तानी दइगु कथं चलः चीकेगु जिम्मेवारी नं सम्बन्धित ठेकेदारया हे खःगु धयादिल । वय्कःया कथं लोक पथय् बर्खाय् जक मखसें हिउँदय् नं सुख्खा चलः वनेगु याः । ‘चलः चीकेत भट्टेडाँडा, झाँक्रीडाडा व छपेलीइ यानाः स्वंगः स्काभेटर तयारी अवस्थाय् तय्माः,’वय्कलं धयादिल, ‘वागमती प्रदेश सरकारपाखें प्युटार–आश्राङ–गिम्दी सडक स्तरोन्नति याय्त थगुने ५० लाख व थुगुसी ५० लाख विनियोजित जूगु दु ।’
लोकपथया यल खण्ड अन्र्तगत बगुवानिसें टिकाभैरवतक्क सडक निर्माणया ठेक्का ०७५÷०७६य् सुर्य÷वाइबा जेभीं निदँय् क्वचाय्केगु यानाः १४ करोड तकाय् ठेक्का चूलाकूगु खः । सुर्य÷वाइबा जेभीं भट्टेडाँडानिसें छपेली लिक्कया सडकया चलः चीकेधुंकूगु दु । लोकपथया दक्कले आपाः चलः छपेली खण्डय् दु । सुर्य÷वाइबा जेभीया सञ्चालक केदारनाथ तिमिल्सेनां योजनाया इन्जिनियरं लगत इस्टिमेट यानाब्यूसा तत्काल चलः चीकेगु न्ह्याकेगु धाल ।
कान्तिलोक पथ योजनाया इन्जिनियर दिपेश रजकया कथं छपेली क्षेत्रय् कमजोर भौतिक संरचना दु । ‘पहाडी भेगय् वा वयांतुं च्वनी । छक्वः चीकेधुंकाः हाकनं व हे थासय् चलः कुतुंवःसा दोहोरो खर्च जुइ,’वय्कलं धयादिल, ‘अथेजुयाः छुं ईया लागिं पियागु खः ।’ वय्कलं डोजरया लागिंमाःगु डिजेल छ्वय्धुनागु धयादिलल ।
दक्षिणय् चलःया हुनिं ८१ खा छेँ जोखिमय् दु । दक्कले आपाः महाँकाल गाउँपालिकाया बुखेल, ठूलादुर्लुङव चन्दनपुरय् यानाः ३५खा छेँ, कोन्ज्योसोम गाउँपालिकाया शंखु, दलचोकी व चौघरेय् यानाः २५ व बागमती गाउँपालिकाया इकुडोल, घुसेल, माल्टाया च्वय्या भागया यानाः २१ खा छेँ चलःया जोखिमय् दु । चलःया हुनिं गिम्दीया राज लोप्चन व बुद्ध रुम्बाया ११ परिवार विस्थापित जुल ।
वागमती गाउँपालिका–७या वडाध्यक्ष नवराज सञ्जेलं विस्थापित परिवारयात जःलाखला बुँइ बाय् च्वनेगु व्यवस्था याय्धुनागु धयादिल । ‘चलः नियन्त्रण याय्त वागमती प्रदेशपाखें फ्याःगु १५ लाखपाखें ग्याबिङ व तार जाली तया,’ वय्कलं धयादिल ।
लेले–चन्दनपुर सडक अन्र्तगत टुटुवा साङवास व दारपाया क्षेत्रय् नं चलः कुतुंवयाः लँ अवरुद्ध दु । थन स्थानीयबासी जोखिम फयाः कच्ची चिब्यागु गोटिखेल–मानिखेल–बुखेल–दलचोकी सडक जुयाः चापागाउँ थ्यनेत बाध्य दु।
वागमती खुसिया बाः आश्राङया लुकनी बेसीइ दुहांवइगु जोखिम नं उत्तिकं दु । सांसद नवराज सिलवालं खुसि बस्तीइ दुहां वय्के मबीत सिचाई मन्त्रालयपाखें छगू करोड बजेट व्यवस्था दुगु धयादिल । ‘घुसेलय् चलः रोकथाम याय्त २सः व ५० तारजाली व थाय्थासय् धःया व्यवस्था यानागु दु स्थानीय तहलिसेया समन्वयस चलःया जोखिमय् लाःगु छेँयात सुरक्षित थासय् स्थानान्तरण याय्गु ज्या जुयाच्वंगु दु ।’ वय्कलं धयादिल ।
महाँकाल गाउँपालिकाया अध्यक्ष रामचन्द्र दाहालं चलःया जोखिमय् लाःगु रातोमाटेया १२ छेँया सामान ल्ह्यय्गु ज्या जुयाच्वंगु धयादिल ‘रातोमाटेय् तःधंगु चलः कुतुंवय्त्यंगु खनेदु,’ वय्कलं धयादिल, ‘पिडित परिवायात याकनं हे स्थानान्तरण याय्।’ सडक अवरुद्ध जूबलय् किसान नं मर्काय् लाःगु दु ।
यलजिल्ला दुग्ध उत्पादक सहकारी संघया न्वकू कृष्ण बलया कथं कान्तिलोक पथ सडक जुयाः न्हिं ८द्वः लिटर दुरु शहर थ्यंकः वनेगु याः । ‘सडक मचाःबलय् माल्टा, प्युटार, गिम्दी, आश्राङ लिसेंया यानाः ४५सः किसान मर्काय् लाःगु दु,’ वय्कलं धाल । तरकारी खेती याइपिं किसानतय् समस्या नं अथे हे दु । गिम्दीया शिवप्रसाद दाहालया कथं व्यवसायिक तरकारी खेती याइपिन्सं नं न्हिं २द्वः घाटा फयाच्वंगु दु ।
भट्टेडाँडा, गिम्दी, आश्राङ, प्युटार, माल्टा, घुसेलपाखें सिजनय् न्हिं १० देखि १५द्वः किलो व अफसिजनय् ९द्वः किलोतक्क बजार वनी । लेले–चन्दनपुर सडक जुयाः गोटीखेल, शंखु, बुखेल, नल्लु, भारदेउ, चौघर, ठुर्लादुर्लङ, कालेश्वरं सिजनय् न्हिं ३०द्वः किलो व अफसिजनय् ९द्वः किलो तरकारी बजार वनी ।
बागमती गाउँपालिका प्रवक्ता विष्णु तिमल्सेनांचलखं अवरुद्ध सडक चाय्केत ६० लाख बजेट विनियोजित यानागु धयादिल । ‘कोभिड–१९ या हुनिं चलः नियन्त्रणया लागिं केन्द्र सरकारं फ्याःगु १ करोड व प्रदेशपाखें फ्याःगु ५० लाख मवःबलय् समस्या ज्यंकेत थाकूगु खः,’वय्कःया धापू दु ।
गोदावरी नगरपालिका–१२ थेचोय् नं चलःया हुनिं स्वखा छेँ जोखिमय् दु । काठमाडौं उपत्यका नगर विकास प्राधिकरण जिल्ला आयुक्तया ज्याकू यलया स्वीकृति विना लालाःथे याःगु प्लटिङया हुनिं बस्ती जोखिमय् लाःगु खः । थ्व बारेय् स्थानीयं थगुने गोदावरी नगरपालिकाय् उजुरी बिल । न्यायिक समितिइ सहलह जुल । प्लटिङ सञ्चालक जितन कार्की व स्थानीय दिपक केसी दथुइ चलः रोकथाम याय्त २०७६य् वाल तय्गु सहमती जुल ।
तर, समितिया दच्छि बीधुंकलं नं वाल तय्त न कार्कीं पहल यात न त कारबाही याय्त गोदावरी नगरपालिकाया उपमेयर मुना अधिकारीं हे । ठेकेदार कार्कींआःयात प्लाष्टिक तय्धुनागु व छुं दिनं हे वाल दय्केज्या न्ह्याकेगु धयादिल । यलया प्रमुख जिल्ला अधिकारी नारायण प्रसाद भट्टं बस्ती हे जोखिमय् लाःगुलिं अध्ययन याय्त तत्काल प्राविधिक टोली खटे याय्गु तयारी जुयाच्वंगु धयादिल।
Categorized in राष्ट्रिय
