संसदय् दर्ता जूगु मिडिया काउन्सिल विधेयक लित मकाइगु सरकारं स्पष्ट याःगु दु ।

 

मन्त्रीपरिषद मुँज्याया निर्णय सार्वजनिक यायेत थौं विहिवाः सिंहदरबारय् ग्वसाः ग्वःगु पत्रकार सम्मेलनय् सरकारया प्रबक्ता नापं सूचना तथा सञ्चार, प्रविधिमन्त्री गोकुल बाँस्कोटां उगु खँया जानकारी बियादीगु खः ।

 

मन्त्री बाँस्कोटां ब्यावसायिक शुद्धता, मर्यादा, सुरक्षा व अभिव्यक्ति स्वतन्त्रतायात सुनिश्चित यायेगु खँयात सरकारं लसकुस याइगु जूसां नं विधेयक लित धाःसा मकाइगु स्पष्ट यानादिल ।

 

प्रेसयात कमजोर दयेकेगु, थुकियात गःपः तीगु व थुकियात संकुचन यायेगु सरकारया छुं नं आज्जु मदुगु नं मन्त्री बाँस्कोटां दावी यानादिल । विधेयकय् सरोकारवालापिनिगु छ्याता धाःसा दुथ्याकीगु मन्त्री बाँस्कोटाया धापू खः । पत्रकारिताया मूल्य मान्यतायात नालाकासें दर्शक, श्रोता व पाठकप्रति उत्तरदायी जुइत तकं वय्कलं इनाप यानादिल ।