दाङय् खुसिं कार चुइकूबलय् प्यम्ह सित, कास्कीइ चलखं ल्हानाः स्वम्ह मन्त
गुंलागा एकादशी ११४१, भाद्र १७ बिहीवाः
दाङया घोराहीइ खुसिं कार चुइकूबलय् कारय् दुपिं प्यम्ह सीगु दु ।
घोराही–लमही सडकखण्ड अन्तर्गत लाःगु सिस्ने खुसिं चुइकूबलय् घोराही–१३य् च्वंम्ह ४०दँया रितामाया पुन, ३२ दँया सुशीला श्रेष्ठ, घोराही–१४याम्ह ३१दँया राधा कुँवर व ४२ दँया यमुना केसी मदुगु जिल्ला प्रहरी ज्याकू दाङं न्ह्यथंगु दु ।
बजार वनाः रुपेडिया जुयाः लिहां वयाच्वंबलय् वंगु बहनी १०ताः ईपाखे खुसि छीगु झ्वलय् उपिं दक्वसित कार लिसें खुसिं चुइकूगु खः । तर कारचालक घोराही–१५ या नरबहादुर पुनया तुति त्वःधूगु अवस्थाय् उद्धार यानाः वासः यायेत राप्ती स्वास्थ्य विज्ञान प्रतिष्ठानय् भर्ना याःगु दु । मदुम्ह राधा व सुशीला घोराही–१६ या जगत श्रेष्ठया म्ह्याय्पिं खः ।
थुखे, पोखराय् चलखं ल्हानाः स्वम्ह सीगु दु । पोखरा महानगरपालिका– ११ भञ्ज्याङ नमुनात्वाःया छम्ह व पोखरा– २० भलामया निम्ह चलखं ल्हानाः सीगु कास्कीया प्रहरी प्रवक्ता डिएसपी सुवास हमालं जानकारी बियादिल ।
भलामया कृष्ण श्रेष्ठया छतँया छेँ चलखं ल्हाःबलय् ४५दँया कृष्ण श्रेष्ठ व वय्कःया ३५ दँया जहान सुनमाया तामाङ मदुगु खः । उमि स्वदँ दुम्ह काय् तनाच्वंगु दु । अथे हे, नमूना त्वाःया लक्ष्य नेपालीया छेँ चलखं ल्हाःबलय् ४२ दँया लक्ष्य नेपाली मन्त ।
वय्कःया १४दँया म्ह्याय् सृष्टी नेपाली घाःपाः जूगु दु । अथे हे, पोखरा– ११ बसेरीया एकदेब तिमिल्सिनाया छेँ ल्हाःबलय् स्वम्ह घाःपाः जूगु दु ।
Categorized in राष्ट्रिय
