दिल्ली न्हापागु पटक इन्डियन प्रिमियर लिगया फाइनलय्
लहानान्युज | कौलागा नवमी ११४०,कार्तिक २४ सोमवाः
दिल्ली क्यापिटल्स न्हापागु पटक इन्डियन प्रिमियर लिग (आईपीएल)या फाइनलय् थ्यःगु दु। युएईलय् जुयाच्वंगु १३ क्वःगु संस्करणया लिग अन्तर्गत निक्वःगु क्वालिफायरय् सनराइजर्स हैदरावादयात बुका दिल्ली फाइनल थ्यःगु खः।
एलिमिनेटरय् बैंगलोरयात बुका हैदरावाद स्वक्वः तक फाइनल थ्यःनेगु लक्ष्य पूरा जुइ मफुत। २०१६ या च्याम्पियन हैदरावाद २०१८ या फाइनलय् चेन्नाई नाप बुगु खः।
दिल्ली आः उपाधिया लागि सर्वाधिक प्यक तक विजेता मुम्बई इन्डियन्स नाप म्हितीइ जुगु दु। न्हापागु क्वालिफायरय् दिल्लीं मुम्बई नाप ५७ रन बुकूगु खः। थुगु सिजन लिग चरणय् निकः व प्लेअफ छकः याना स्वकः तक मुम्बई नाप दिल्ली बुइ धुकुगु दु।
फाइनल थ्यनिगु झ्वलय् दिल्लीं हैदरावादयात १९० रनया लक्ष्य ज्वना निर्धारित २० ओभरय् ८ विकेटय् १७२ रन जक दयेके फुगु खः।
हैदरावादया लागि केन विलियमसनं ४५ बलय् ५ चौका व ४ छक्काया ग्वाहालि ६७ रन, अब्दुल सामद १६ बलय् २ चौका व २ छक्का ३३ रन, मनिस पाण्डे २१, कप्तान डेविड वार्नर १७ व रासिद खानं ११ रन दयेकूगु खः।
बलिङय् दिल्लीया लागि कागिसो रबाडां ४ ओभरय् २९ रन बिया प्यःगु विकेट काःगु खः। अथेहे स्टोइनिसं ३ ओभरय् २६ रन बिया ३ विकेट कागु खः।
टस त्याका न्हापा ब्याटिङ याःगु कप्तान श्रेयस अय्यरंया निर्णययात ब्याट्सम्यानपिन्स सही सावित यासे दिल्लीं ३ विकेट गुमे याना १८९ रन दयेकूगु खः। दिल्लीया ओपनर शिखर धवनं अर्धशतक दयेकूगु खः। धवनं ५० बलय् ६ चौका व २ छक्काया ग्वाहालि ७८ रन, शिमरोन हेतमायरं अविजित ४२ रन दयेकूगु खः। हेतमायरं २२ बलय् ४ चौका व १ छक्का थ्वाःगु खः। स्टोइनिसं २७ बलय् ५ चौका व १ छक्काया ग्वाहालिं ३८ रन व कप्तान श्रेयास अयेरं २१ रन दयेकूगु खः।
हैदरावादया लागि सन्दीप शर्मा रासिद खान व ज्यासन होल्डरं छगु छगु विकेट काःगु खः।
आईपीएल २०२० या फाइनल कासा वइगु मंगलवाः मुम्बई व दिल्ली दथुइ जुइ।
Categorized in कासा
