दुई तिहाई बहुमतया अतिकं दुरुपयोग : नेता पौडेल
नेपाली कांग्रेसया वरिष्ठ नेता रामचन्द्र पौडेलं वर्तमान सरकारं दुई तिहाई बहुमतया अतिकं दुरूपयोग याःगु टिप्पणी यानादीगु दु ।
 
 
महाधिवेशन प्रतिनिधिपिनिगु नितिं सुर्खेतया वीरेन्द्रनगरय् ग्वसाः ग्वःगु पार्टीया प्रदेश स्तरीय प्रशिक्षण ज्याझ्वःया उलेज्या यानादिसें पौडेलं उगु खँ धयादीगु खः ।
 
 
नेता पौडेलं वर्तमान सरकारं सार्वजनिक निकाय, अख्तियारयात दबाब बीगु, प्रेस स्वतन्त्रतायात कब्जा यायेत स्वयेगुथें जाःगु ज्याय् बहुमत छ्यःगु नं टिप्पणी यानादिल । ‘कम्यूनिष्टं सत्ता प्राप्त याःसां नं सञ्चालन यायेफूगु मदुनि ।’ नेता पौडेलं धयादिल ।
 
 
कम्यूनिष्टं देशय् बेचैनीया अवस्था ब्वलंकूगु द्वपं बियादिसें पौडेलं लिपांगु इलय् जनतां कम्यूनिष्टयात विश्वास याये त्वःतूगु नं धयादिल । वय्कलं आः जनतां नेपाली कांग्रेसयात हे भलसा यायेगु ई लिहांवःगु तकं दावी यानादिल ।
 
 
‘सरकारय् प्रजातान्त्रिक सोच दयेमाःगु खः, अथे मजुल ।’ नेता पौडेलं धयादिल, ‘सरकारं फुक्कसित न्याय बीमाःगु खः । तर प्रतिपक्षीयात क्वत्यलेगु, जनतायात न्याय बीगु खँय् बिचाः मयासे थ्व सरकार अधिनायकवादी जुइधुंकल ।’
 
 
कांग्रेसया उपसभापति विमलेन्द्र निधिं फुक्क कार्यकर्तातय्त ब्यक्ति स्वयां नं बिचाःया ल्यूने वनाः पार्टी दुना गुट न्हंकेगु नितिं भूमिका म्हितेमाःगु धयादिल । वर्तमान सरकारं अलोकतान्त्रिक चरित्र न्ह्यब्वयाच्वंगु निधिं द्वपं बियादीगु दु ।
Categorized in राजनीति