देय्या आपालं थासय् वाः वइगु पूर्वानुमान
बछलागा सप्तमी ११४१, असार १७ बिहिवाः
जल तथा मौसम पूर्वानुमान महाशाखां देय्या आपालं थासय् थौं तच्वकं वाः वइगु संभावना दूगु न्ह्यथंगु दु ।
महाशाखां देय्यंक मनसुनी वायुया सक्रिय प्रभाव दूगु व देय्या तराई भूभाग लिक्कसं मनसुनी न्युन चापीय रेखा दूगुलिं तच्वकं वाः वइगु न्ह्यथंगु खः । महाशाखाया कथं प्रदेश १, प्रदेश २, बागमती व गण्डकी प्रदेशया आपालं थासय् नँ न्याना मलः जुया तच्वकं वाः वयाच्वंगु दु ।
थ्वहे दथुइ मदिक्कया वाः वःगु हुनिं देय्या थी थी थाय्या सडक अवरुद्ध जूगु दु । थौं सुथय् कुतुंवःगु चलःया हुनिं नारायणगढ–मुग्लिन सडकखण्ड अवरुद्ध जूगु दु । इच्छाकामना गाँँपालिका–६ पाँचकिलोय् च्वसं कुतुंवःगु चलःखं निखेरया लँपू अवरुद्ध याःगु जिल्ला प्रहरी ज्याकु चितवनं न्ह्यथंगु दु । मदिक्क वाः वयाच्वंगु व चलः तकं कुतुंवयाच्वंगुलिं लँपू चायेकेत थाकुयाच्वंगु जिल्ला प्रहरी प्रवक्ता प्रहरी नायब उपरीक्षक सूर्यबहादुर थापां धयादील ।
थुखे पाल्पाया तिनाउ गाउँपालिका–३ सिद्धबाबाय् चलः कुतुंवःलबय् सिद्धार्थ राजमार्ग अन्तर्गत पाल्पा–बुटवल सडक खण्ड बन्द जूगु दु । थुगु सडक खण्डय् न्हिं चलः वनेगु यानाच्वंगु दु । अथेहे चलःया हुनिं काठमाडौं व हेटौंडा स्वाइगु सतक नं बन्द जूगु दु ।
अथेहे कास्कीया घाँसीकुवाय् चलः वनेधुंका पोखरा–घाँसीकुवा सडक खण्ड ठप्प जूगु प्रहरीं न्ह्यथंगु दु । प्रहरीया कथं पृथ्वी राजमार्ग, सिद्धार्थ राजमार्ग व नारायणगढ–मुग्लिङ सडक खण्डय् चलः चिइकेगु कुतः जुयाच्वंगु दु । राष्ट्रिय राजमार्गया थी थी ११गू थासय् अझं सतक चाले मपूmगु सडक विभागं न्ह्यथंगु दु ।
Categorized in राष्ट्रिय
