२०८० चैत्र १६, शुक्रबार

देय् दबूपाखें नवनिर्वाचित जनप्रतिनिधिपिन्त भिन्तुना

बुखँ श्रोत : राजेन्द्र रंजित | तछलागा चतुर्दशि ११३७ (जुन २३ २०१७)

नेवाः देय् दबू येँ जिल्ला, यल जिल्ला व नेवाः मिसा दबूया मंकाः ग्वसालय् स्वनिगःया स्थानीय तहलय् निर्वाचित नेवाः जनप्रतिनिधिपिन्त हंगु दु ।
 
ज्याझ्वलय् नुगःखँ तयेगु झ्वलय् किपू महानगरपालिकाया मेयर रमेश डंगोलं नेवाः भायया संरक्षण व सम्वर्ध्दनया नितिं किपू नगरपालिकाय् वःगु अप्वः धैथें निवेदनयात नेपालभासं भाय् हिलेधुंकूगु जानकारी बियादिल ।
 
अथे हे यल महानगरपालिकाया मेयर चिरी बाबु महर्जनं यल महानगरपालिकाय् न्हापा हे जुइधुंकूगु नेपालभाषा डेस्क तयेगु निर्णययात आः कार्यान्वयनय् हयेगु धयादिल । लिसें महर्जनं १२ कक्षातक्क स्थानीय भाय् तयेगु निर्णय संविधानय् दयेधुंकूगुलिं उकियात नं थम्हं कार्यान्वयन यायेत पहल यायेगु धयादिल । 
 
ज्याझ्वलय् येँया उपमेयर हरि प्रभा (श्रेष्ठ) खड्गी, टोखा नगरपालिका उप–मेयर ज्ञानमाया महर्जन लिसें नं नुगः खँ तयादीगु खः ।
 
ज्याझ्वलय् स्वनिगः दुने नवनिर्वाचित मेयर, उपमेयर, वडाध्यक्षलिसेंया जनप्रतिनिधिपिन्त नेवाः तजिलजि कथं बेतालिं चिकूगु खःसा नेवाः देय् दबूया केन्द्रिय नायः नरेश ताम्रकारं भिन्तुना पौ लःल्हानादीगु खः ।
 
देय् दबू येँ जिल्ला नायः मचाराजा महर्जनं लसकुस न्वचु तयादीगु ज्याझ्वः मिसा दबूया नायः रश्मिला प्रजापतिया नायकय् जूगु खः ।
 
Categorized in राष्ट्रिय