देय् दबूया कोषाध्यक्ष अन्जिता खड्गी हे कायम
नृपेन्द्रलाल श्रेष्ठ | तछलागा द्धितीया ११३९ (जुलाई ४ २०१९)
नेवाः देय् दबूया कोषाध्यक्ष अन्जिता खड्गी हे कायम जुगुदु । वंगु फागुन २४/२५ गते धनगढी जुगु केन्द्रीय मूँज्यां अन्जीता खड्गीजुयात चीका सचिब शान्त श्रेष्ठयात भाला बिगु खः ।
उगु निर्णयया बिरुद्ध खड्गीं येँया जिल्ला प्रसाशन कार्यालय् उजुरी तःगु खः । उगु उजुरीया आधारय् थौं निगु पक्षयात छथाय् तया सहलह याकुगु खः ।
थौंं येँ जिल्ला प्रसाशनय्ं नेवाः देय् दबूया नायः नरेश ताम्रकार व महासचिव माइला बाबु द्यौला नाप कोषाध्यक्ष अन्जिता खड्गी व नेपाल खड्गी सेवा समितिया पुलाम्ह नाय: व आ याम्ह संरक्षक मनोज नेवाः खड्गी सहभागी जुगु खः ।
उगु निगु पक्षयात छथाय् हे तया येँ जिल्ला प्रशासनया प्रमुख राम प्रसाद आचार्यं बिधान सम्मत मजुलि अन्जिता खड्गीयात कोषाध्यक्ष हे कायम याये माःगु, दबूया नायः पाखें भैपरी आउने शीर्षकया नामे य: य थें खर्च याना च्वंगु पारदर्शी याये माःगु व देय् दबूया आःया बिधान लोकतान्त्रिक मजुगुलिं याकन हे लोकतान्त्रिक कथं संशोधन याना पेश यायेत निर्देशन न बिगु दु ।
थौंया येँ जिल्ला प्रशासनया निर्णय लिपा दांभरी अन्जीता खड्गीजुं लहनान्युज नाप खँल्हानादिसें देय् दबूया नायःपाखें बिधिसम्मत ज्या मजुगु नापं आर्थिक पारदर्शी कथं खर्च मजुगु खँ तये वं थःत कोषाध्यक्ष पदं चिइका नाय: नं थ य: थें याय्त स्वगु खः धका धयादिगु खः । आः थःगु कुतः धइगु आर्थिक पारदर्शी कथं देय् दबू न्ह्याकिगु जुइ धका धयादिगु दु ।
Categorized in राष्ट्रिय
