देय् “असफल राष्ट्र” जुइगु लँपुइ वनाच्वन : कांग्रेस नेता सिंह
लहना न्यूज | ने.सं. ११३९ दिल्लागा दशमि (२८ जुलाइ, २०१९), सञ्चरवाः
प्रमुख प्रतिपक्षी दल नेपाली कांग्रेसया नेता प्रकाशमान सिंहं वर्तमान सरकारं रचनात्मक ज्या याःसा ग्वाहालिमिया भूमिका म्हितेत तयार दुगु धयादीगु दु ।
येँया गुह्यश्वरी बाल शिक्षा माध्यामिक विद्यालय, थापाथलीइ ब्वनाच्वंपिं निसःम्ह ब्वँमिपिन्त ब्वनेकुथिया लँ इनेगु व एसईई परीक्षाय् पास जूपिन्त सम्मान यायेगु ज्याझ्वलय् न्ववानादिसें कांग्रेसया नेता सिंहं उगु खँ धयादीगु खः । वय्कलं थः थवय् द्वपं बीगु पलेसा देशयात असफल देय् जुइगुपाखें बचे यायेत फुक्क छधी छप्पँ जुइमाःगु नं धयादिल ।
सरकारं बांलाःगु ज्या याय्मा, देशय् विकास जुइमा धकाः ग्वाहालि याय्गु इच्छा दुसां नं फुक्कसिगु ग्वाहालि कयाः न्ह्याः वनेगु पलेसा प्रधानमन्त्री भाषणवाजी जक यायेगु व थः स्वयां फरक बिचाः तयादीपिनिगु मानमर्दन याय्गु ज्या जुयाच्वंगु खँय् नं पूर्व महामन्त्री सिंहं कुंखिनादिल ।
वर्तमान सरकारं समृद्धिया खँ ल्हायेगु नैतिकता तकं तंकेधुंकूगु टिप्पणी यानादिसें नेता सिंहं थुगु सरकारं बांलाःगु ज्या यायेगु ला छु, मेपिन्सं याःगु ज्याया जस कायेत तकं अयोग्य जूगु धयादिल ।
नेता सिंहं अन्तर्राष्ट्रिय जगतयात विश्वासय् कयाः ज्या याये मफूगुलिं देय् “असफल राष्ट्र” जुइगु लँपुइ वनाच्वंगु द्वपं बियादिल । वर्तमान सरकार दयेकेधुंकाः कुटनैतिक लागातकं विश्वस्त जुइमफूगु नेता सिंहया धापू खः ।
Categorized in राजनीति
