धरहराया विषयस ध्यान बीमाःगु पक्ष
जुजुमान महर्जन
विनाशकारी भुखाचं लिच्वः लाकूगु आपालं सम्पदात मध्ये येँया धरहरा नं खः । क्षतिग्रस्त जूगु थुगु धरहराया पुनःनिर्माणयात कयाः यक्व हे चर्चा परिचर्चा नं जूगु खः । अझ धाय्गु खःसा सरकारी स्तरं हे स्वनिगःया विश्व सम्पदाया धलखय् लाःगु सम्पदायात स्वयां नं अझ महत्व बियाः च्यूताः क्यना वयाच्वंगु धरोहर खः ।
तर थुगु धरहरा क्षेत्रया व्यवस्थापनया जिम्मा काःगु साइड वाकर्सपाखें थुगु सम्पदाया संरक्षण याय्गु स्वयां थुगु सम्पदायात छ्यलाः आय आर्जन याय्गु बाहेक मेगु छुं नं याःगु खनेमदु । गुकियात कयाः स्थानीय जनतां विरोध याना वयाच्वंगु खः ।
धरहरा पुनःनिर्माणया झ्वलय् राष्ट्रिय पुनःनिर्माण प्राधिकरणं निवाःया दुने अन दुगु संरचना चीकेत धाःगु खःसां नं उकियात चीकेगु ज्या मजूगुलिं येँ महानगरपालिकां २४घौया दुने चीकेत म्याद ब्यूगु खः । तर उकियात नं वास्ता मयाःगुलिं अन्ततः महानगरपालिकां डोजर छ्यलाः अनया संरचना थुनेगु ज्या जूगु खः ।
वि.सं. २०५५ सालय् येँ महानगरपालिकाया तत्कालीन प्रमुख केशव स्थापितं उगु क्षेत्रया व्यवस्थापनया जिम्मेवारी साइड वाकर्सयात ब्यूगु खःसा नं सम्झौता अःखः अन पुनेगु नापं नय्गु नसा ज्वलं तयाः बालं ब्यूगु खः । उलि जक मखु, भुखाचं धरहरा दुनेधुंकाः नं धरहराया ल्यंदनिगु ब्वयात संरक्षण याय्गु ज्यातक मजुल । तर अनया जःखः लागा बालं बियाः आम्दानी यानाच्वंगु खःसा धरहरा व्यवस्थापनया जिम्मेवारी काःगु साइड वाकर्सं महानगरपालिकायात राजश्वतकं मपूसे च्वनाच्वंगु खः ।
थजाःगु अवस्थाय् नं साइड वाकर्सयात कारवाही याय्मफूगु छगू अजू चायापूगु खँ खःसा मेगु अझ अजू चायापूगु खँ धइगु सम्झौता जःछि धरहराया सुरक्षा, रंग पाय्गु नापं छुं नं कारणबश धरहरा दुंसा वा चर्के जूसा उकिया पुनःनिर्माण याय्गु ज्या निगूगु पक्ष अर्थात साइड वाकर्सया खः । तर धरहरा दुनाः नं उगु सम्झौतायात छुं हे वास्ता मयासे अनया लागायात साइड वाकर्सं बालं बियाः आम्दानी यानाच्वंगु नं टुलुटुलु स्वयाच्वंगु खः ।
थजाःगु सम्झौता दय्क दय्कं नं धरहरा जनताया धेबां पुनःनिर्माण याय्गु धकाः भुखाय् ब्वःगु ईया तत्कालीन व थौंकन्हय् बहालवाला प्रधानमन्त्रीं न्ववाना जूगु खँयात नं उगु इलय् अर्थपूर्णकथं काःगु खः । थुगु खँय् निगूगु पक्षयात छाय् कारवाही मयात वा उगु धरहरा पुनःनिर्माण याय्त छाय् दबाब मबिल, गन कि उगु ज्या जनताया धेबां दय्केत बाध्य जुल ?
आः महानगरपालिकां धरहरा पुनःनिर्माणया नितिं अनच्वंगु संरचनायात चीकाः मेगा प्रोजेक्टकथं २२गू तल्ला दुगु धरहरा दय्केगु योजना सार्वजनिक जूगु दु । तर थ्व दय्केगु ज्या बांलाःगु खःसां नं न्हापा यानातःगु सम्झौतायात अथें त्वःतेगु खः वा कार्यान्वयन यानाः न्ह्याःवनेगु खः । थुखे नं महानगरपालिकां बिचाः याय्माःगु खनेदु ।
