२०८१ आषाढ ५, बुधबार

धर्मादित्य सिरपालं संचारकःमि प्रज्वल सम्मानित

लहनान्यूज | दिल्लाथ्व एकादशी ११३७ (जुलाई ४ २०१७)

थुगुसीया धर्मादित्य धर्माचार्य सिरपाः सञ्चारकःमि प्रज्वल शाक्ययात लःल्हाःगु दु ।
 
मांभाय् पुचः यलं पुचःया वहःदँ हनेगु लिसें नेपालभाषाया न्हापांम्ह पत्रकार व भाषाजवाः धर्मादित्य धर्माचार्यया ११६क्वःगु बुदिं हनेगु झ्वलय् ‘तिकिझ्याः’ वाःपौया सह सम्पादकलिसें उपत्यका एफ.एम.या नेपालभाषा ज्याझ्वःया कजि शाक्ययात धर्मादित्य धर्माचार्य सिरपाः लःल्हाःगु खः । 
 
ज्याझ्वलय् संस्कृतिविद् डा. सत्यमोहन जोशीं सम्मानित शाक्ययात दोसल्लां न्ययेकाः हनापौ लःल्हानादिलसा तका सिरपाः पुचःया नायः हेरारत्न शाक्यं  लःल्हानादिल । थुगु सिरपाः १०द्वः तका राशिया खः । 
 
लिसें ज्याझ्वलय् मांभायया ख्यलय् ज्वःमदुगु योगदान ब्यूगु धासें वरिष्ठ समाजसेवी मोतिलाल शिल्पकार, कुसुम गुरुमां व माधवी गुरुमांयात नं हंगु खः ।
 
उगु हे ज्याझ्वलय् पुचःपाखें पिथना वयाच्वंगु दँपौ ‘खादलू’या संस्कृतिविद् जोशी, नेवाः देय् दबूया नायः नरेश ताम्रकार व वल्र्ड नेवाः अर्गनाइजेशन, नेपाः देय् मू कवःया कार्यवाहक नायः शाक्य सुरेनं मंकाः रुपं विमोचन यानादिल ।
 
पुचःया नायः हेरारत्न शाक्यया सभानायकय् जूगु ज्याझ्वलय् सिरपाःया ल्यज्यायात कयाः सिरपाः कवःया कजि डा. पुष्पराज राजकर्णिकारं जानकारी बियादिल । 
 
अथे हे शताब्दी पुरुष डा. सत्यमोहन जोशी, नेवाः देय् दबूया नायः नरेश ताम्रकार, पुचःया सल्लाहकार नापं वल्र्ड नेवाः अर्गनाइजेशन, नेपाः देय् मू कवःया का.नायः शाक्य सुरेन, सम्मानित व्यक्तित्व मोतिलाल शिल्पकारलिसें नं नुगः खँ तयादीगु खः ।
Categorized in राष्ट्रिय