धोबीखोला सिथय् अत्याधुनिक निगु पार्क
नृपेन्द्रलाल श्रेष्ठ | गुंलाथ्व तृतीया ११४०,साउन ८ बिहीवाः
येँ महानगरपालिकां सार्वजनिक जग्गा संरक्षण यायेगु कथं येँ मनाप वडा–५य् महानगर व नरबुद्ध पार्क निर्माण ज्यायायेगु त्यःगु दु । महानगरपालिकां हाँडीगाउँया धोबी खोला सिथय् त्वधुगु ताँ निसे कालो पुल तकया दथुइ करीब ३६ रोपनी सार्वजनिक जग्गा मध्ये ६ रोपनी ११ आना क्षेत्रय् नरबुद्ध पार्क व ८ रोपनी क्षेत्रफलय् महानगर पार्क निर्माण यायेगु ज्याझ्वः न्ह्याकूगु दु ।
उगु सहलह ज्याझ्वलय् येँ महानगरपालिकाया मेयर विद्यासुन्दर शाक्यं येँ महानगरपालिकां न्ह्याकुगु थुगु योजना बजेट अभावं ज्या दिइ मखू धका धयादिसे ‘जिमिसं नरबुद्ध पार्कया बारेय् यक्को सहलह याये धुकागु दु धयादिगु दु । महानगरपार्कया बारेय् स्थानीय नाप प्रारम्भिक चरणय् सहलह जूगु खः ।
वयकलं छिकपिनिगु सुझावयात दुथ्याका निर्माण प्रक्रिया न्ह्यने वनेइगु जुइ धका धयादिसे पार्कय् सकसिगु अपनत्व जुइगु जिमिसं भलसा कयागु दु धका मेयर शाक्यं ‘जिमिसं आर्थिक वर्ष २०७७÷०७८ जक सार्वजनिक जग्गा व खुल्ला थासय् संरक्षण याना अन हरियाली प्रबर्धन यात ध्यानय् तया ३० स्वया अप्व पार्क निर्माण यायेगु लक्ष्य कयागु दु धका धयादिगु दु । हरेक वडाय् पार्क निर्माण यायेगु जिमिगु तयारी दु नाप थुगु वडा–५ य् ज्या न्ह्याके दया जिपि तसकं लय्तागु दु धका धयादिगु खः ।’
लागत अनुमान ३ करोड ३७ लाख ३८ द्धः तुइगु अनुमान याना नरबुद्ध पार्क निर्माणया लागि येँ महानगरपालिकां आर्थिक वर्ष २०७७÷०७८ या लागि १ करोड ५० लाख विनियोजन याःगु दु । उक्त पार्क प्रस्ताव आव्हानया चरणय् थ्यःगु दु धका वडा नम्बर–५ या वडा अध्यक्ष रमेश डंगोलं धयादिगु दु ।
उगु ज्याझ्वलय् येँ महानगरपालिकाया उपमेयर हरिप्रभा खड्गी श्रेष्ठ, रोटरी क्लव अफ बागमतीया अध्यक्ष बिजयसागर प्रधान, पूर्वमन्त्री रमेशनाथ पाण्डे, पूर्व प्रशासक लवप्रसाद त्रिपाटी लगायतया पिनिगु न ब्बति दुगु खः ।
