ध्वाखाबहाःया नासःद्यःया देगः जिर्णोद्धार लिपा उलेज्या
शोभा श्रेष्ठ | थिंलागा एकादशी ११४०
येँ महानगरपालिकाया मेयर विद्यासुन्दर शाक्यं येँ महानगरया सँस्कृति, सम्पदाया संरक्षणय् छुं नं कुतः ल्यं मतयेगु धयादीगु दु ।
येँया ध्वाखाबहालय् पुनर्निर्माण क्वचाःगु नासःद्यःया देगः उलेज्या यासें मेयर शाक्यं येँया देगः, फल्चा, विहार आदि लिसेंया साँस्कृतिक सम्पदा संरक्षणया दायित्व स्थानीय सरकारयागु हे खःगु धासें सम्वन्धित खलः, गुथियात संरक्षणया नितिं फक्व व माक्व ग्वाहालि यायेत येँ महानगरपालिका तयार दुगु धयादिल ।
वंगु आइतबाः छगू ज्याझ्वःया दथुइ शाक्यं ध्वाखाबहाःया नासः चुकय् जिर्णोद्धार जूगु नासःद्यःया देगः उलेज्या यानाद्यूगु खः ।
मुक्कं ५ लख ६द्वः व ९९० तका लागतय् जिर्णोद्धार याःगु देगःया पुनर्निर्माणया नितिं कामपा २५ वडा कार्यालयपाखें ३ लख २०द्वः तका ग्वाहालि जूगु खःसा मेगु धेबा जनसमुदायपाखें मुंकूगु खः ।
ज्याझ्वःया सम्वोधन यासें शाक्यं कुतः यात धाःसा याये मफइगु छुं नं मदु धइगु थुगु नासः द्यःया देगः जिर्णोद्धारया ज्यां प्रमाणित याःगु धासें नाथेश्वर (नासःद्यः) मन्दिर पुनःर्निर्माण तथा संरक्षण समितियात च्वछानादिल । झीगु खः झीसं यायेमाः धकाः स्थानीय जन समुदाय न्ह्यचिल धाःसा थन साँस्कृतिक मूर्त अमूर्त सम्पदा संरक्षण बांलाक जुइगु बिचाः वय्कलं तयादिल । स्थानीय सँस्कृति, सम्पदाया संरक्षण यानाः आधुनिक प्रविधियात नं लिनाः न्ह्याःवनेफःसा नेवाः समाजया उत्थान याकनं जुइगु शाक्यया धापू खः ।
अथे हे, कामपा २५ वडाया अध्यक्ष नीलकाजी शाक्यं नेवाःत प्रशासनिक क्षेत्रय् यक्व ल्यूने लानावंगु खँ न्ह्यथँसें आः अभिभावकपिन्सं थः मस्तय्त विदेशय् छ्वयेगु मखसें प्रशासनिक क्षेत्रय् छ्वयाः सचिव, मुख्य सचिव दयेकेगु स्वयेमाःगु धयादिल । प्रशासनिक क्षेत्रय् दख्खल मदयाः हे नेवाः समाज झनझन ल्यूने लानावंगु धयादिल ।
लछिया दुने हे पुनर्निर्माण क्वचायेगु आज्जु खःसां ठेकेदारया लापरवाहिं भचा अप्वः ई काःगु समितिया नायः बुद्धराम महर्जनं धयादिल ।
जिर्णोद्धार ज्याया ल्याःचाः न्ह्यब्वसें समितिया दांभरिं नाति प्रजापतिं देगः पुनर्निर्माणया नितिं १० लख २६द्वः ६४५ तका मुंगु व ल्यं दुगु धेबा देगःया मर्मतसम्भारया नितिं कोषय् जम्मा यानातयेगु जानकारी बियादिल । ज्याझ्वलय् देगः पुनर्निर्माणया नितिं ५द्वः तकां च्वय् ग्वाहालि याःपिं दातापिन्त खादा न्ययेकेगु लिसें सुभाय् पौ लःल्हानाः सम्मान नं याःगु खः । द्ेगःया पुनर्निर्माण वंगु असारया न्हापांगु वालंनिसें न्ह्याःगु खः ।
