२०७७ माघ ८, बिहिबार

नक्कली भारतीय धेबालिसें ज्वंपिं ६म्हेसित सार्वजनिक यात

ने.सं. ११३९ बछलागा षष्ठि (२४ मे, २०१९), शुक्रवाः

प्रहरीं त्रिभूवन अन्तर्राष्ट्रिय विमानस्थलपाखें ७गू करोड ६७गू लख व ९४द्वः भारतीय नक्कली नोटलिसे ज्वंपिं ६म्हेसित थौं शुक्रवाः सार्वजनिक याःगु दु ।
 
थौं महानगरीय प्रहरी ज्याकू, लानीपुखुली पत्रकार सम्मेलन यानाः प्रहरीं नक्कली नोटया कारोबार याइपिं ६म्हेसित सार्वजनिक याःगु खः । ज्वंपिं नक्कली नोट हःपिं स्वम्ह पाकिस्तानी नागरिक व रिसिभ यायेत विमानस्थल थ्यंपिं स्वम्ह नेपाःमि यानाः मुक्कं ६म्हेसित सार्वजनिक याःगु लानीपुखूया प्रवक्ता एसएसपी श्याम ज्ञवालीं जानकारी बियादिल ।
 
कतार एयरया फ्लाइटपाखें दोहा जुयाः नक्कली नोटलिसें येँय् वःपिं पाकिस्तानी नागरिक ४९दँया मोहम्मद अख्तर, ३९दँया नादिया अनवर व ६७दँया नसिर उद्दिनयात ज्वंगु खः । उमिसं विमानस्थलतक हःगु नोट कायेत विमानस्थल थ्यंकादीम्ह युनिस अन्सारी, अन्सारीया ससःकिजा सुयल खानलिसें गाडी चालक सुदन रानाभाटयात ज्वंगु एसएसपी ज्ञवालीं धयादीगु दु ।
 
तक्वमछि हे नक्कली नोट कारोबारया मुद्दा फयाः जेलं बिस्युं वनाच्वंम्ह अन्सारी न्हापा नेशनल टेलिभिजन सञ्चालनय् तकं दुथ्याःम्ह खःसा अन्सारी प्रतिबन्धित भारु निद्वःतकाया नोट कायेत रौटहट जिल्ला रमौली बैरिया नगरपालिका १य् च्वनीम्ह सुयल खानलिसें गाडी चालक सूर्यविनायक नगरपालिका ५, बालकोटय् च्वनीम्ह सुदन रानाभाट विमानस्थल थ्यंकादीगु खः ।
Categorized in अपराध