नगरपालिकाय् संक्रमण दुहां वयेकेमबीगु शंखरापुर मेयरया योजना
समाचार श्रोत : किचः सिंह ज्यापु | चौलाथ्व सप्तमी ११४०
शंखरापुर नगरपालिका दुने छम्हेसित नं संक्रमण जुइकेमबीगु बिचाः कथं थः सक्रिय जुयागु शंखरापुर नगरपालिकाया मेयर सुवर्ण श्रेष्ठं धयादीगु दु ।
लहनान्यूजलिसे खँ ल्हासें मेयर श्रेष्ठं छम्ह नं संक्रमित मदयेकेगु बिचाः दुगु तर छुं जुयाः संक्रमण खने हे दत धाःसां उकिया नितिं नं तयारी न्ह्याकागु धयादिल ।
नगरपालिकाय् मास्क इनेगु अले मास्क तयाजुइगु नितिं सचेत यायेगुया नापं ल्हाः सिलेगु ज्याझ्वः न्ह्याकाच्वनागु मेयर श्रेष्ठं धयादिल ।
निथाय् हस्पितलय् आइसोलेसन वार्ड तयार यानागु व हेल्थ पोस्टय् न्यागू बेडया क्वारेन्टाइन कोथा नं दयेकागु जानकारी ब्युसें श्रेष्ठं सामुदायिक भवन, स्कूल, होटलय् क्वारेन्टाइनया व्यवस्था यानाच्वनागु जानकारी बियादिल ।
विदेशं वःपिं तप्यंक हे थःथःगु छेँय् वंबलय् गुलि पिनं दुहांवल धइगु हे सीमदुगु अवस्थाय् वडा वडापाखें व जःलाखलापाखें जानकारी मुंकाः विदेशं वःपिनिगु अभिलेख तयार यायेधुनागु श्रेष्ठया धापू खः ।
पिनं वःपिं सकसिगु फोन नम्बर मुंकाः सकसितं थम्हं हे फोन यानाः स्वास्थ्य अवस्थाया जानकारी कयागु धासें श्रेष्ठं सकसित होम क्वारेन्टाइनय् च्वनेत धयागु व ज्वर, सेखं थुज्वःगु स्वास्थ्य समस्या वःसा नगरपालिकाय् स्वापू तयेत नं धयागु वयकलं जानकारी बियादिल ।
पिनं वःपिं मध्ये छुं मनूतय् जक होम क्वारेन्टाइनया १४न्हु पूमवंनिगु व आपाःसिया पूवनेधुंकूगु धयादिल । लिसें पिनं वःपिं स्वइकें नं आःतक्क छुं हे स्वास्थ्य समस्या खनेमदुनिगु नं वयकःया धापू खः ।
खाद्य संकट मजुइमा, सुं नं द्यां मलायेमा धइगु ल्याखं नं थम्हं योजना दयेकाच्वनागु श्रेष्ठया धापू खः । न्हिं ज्या यानाः नयेमाःपिनिगु नितिं छगू फरम्याट दयेकाः मुनेगु ज्या न्ह्यःने यंकेधुनागु धासें माःकथं राहत उपलब्ध याकेगु जानकारी नं वयकलं बियादिल । थुकथंया निम्ह आय दुपिं, ज्याला मजदुरी यानाः नयेमाःपिनिगु नितिं ग्वाहालि याये धकाः थीथी संस्थात वयाच्वंगु दुगु धासें थुकिया नितिं संस्थातलिसे सहकार्य नं यायेगु धयादिल ।
नेपालय् थुगु भाइरसया महामारी न्यंकेमबीत सकलें छेँय् हे च्वनेगु दक्कले बांलाःगु उपाय जूगुलिं सकलसित लकडाउनया इलय् छेँय हे च्वनेत वयकलं इनाप यानादिल ।
लकडाउन धइगु छु व छाय् धइगु थुइकाः सकलें पिहां मवःसे छेँय् हे च्वनेत धासें थ्व छुं हे मखु धइथें बिचाः मयायेत नं वयकलं इनाप यानादिल ।
Categorized in राष्ट्रिय
