शेरबहादुर देउवाया मन्त्रिपरिषदय् नवनियुक्त १६ मन्त्री व निम्ह राज्यमन्त्रीं थौं शुक्रबाः पद व गोपनीयताया शपथ काउगु दु।

राष्ट्रपति कार्यालय शीतलनिवासय् ग्वसाः ग्वंगु कार्यक्रमय् मन्त्रीपिन्त राष्ट्रपति विद्यादेवी भण्डारीं व राज्यमन्त्रीपिन्त प्रधानमन्त्री शेरबहादुर देउवां शपथ याकूगु खः।

न्हुगु गठन जुगु मन्त्रिपरिषद् कथं शेरबहादुर देउवा प्रधानमन्त्री, बालकृष्ण खाँण गृह, ज्ञानेन्द्रबहादुर कार्की सञ्चार तथा सूचना प्रविधि, पम्फा भुसाल ऊर्जा, जलस्रोत तथा सिँचाइ, राजेन्द्रप्रसाद श्रेष्ठ सङ्घीय मामिला तथा सामान्य प्रशासन, विरोध खतिवडा स्वास्थ्य तथा जनसङ्ख्या व जनार्दन शर्मा अर्थमन्त्री जुगु दु।

अथेहे डा. मीनेन्द्रप्रसाद रिजाल रक्षा, उमाकान्त चौधरी खानेपानी, डा नारायण खड्का परराष्ट्र, रेणुकुमारी यादव भौतिक पूर्वाधार तथा यातायात, प्रेमबहादुर आले संस्कृति, पर्यटन तथा नागरिक उड्डयन, दिलेन्द्रप्रसाद बडू कानून, न्याय तथा संसदीय मामिला, देवेन्द्र पौडेल शिक्षा, विज्ञान तथा प्रविधिमन्त्री नियुक्त जुगु दु।

महेन्द्रराय यादव कृषि तथा पशुपन्छी विकास, उमा रेग्मी महिला, बालबालिका तथा ज्येष्ठ नागरिक, शशी श्रेष्ठ भूमि व्यवस्था, सहकारी तथा गरिबी निवारण, रामकुमारी झाँक्री सहरी विकास, गजेन्द्रबहादुर हमाल उद्योग, वाणिज्य तथा आपूर्ति, रामसहायप्रसाद यादव वन तथा वातावरण, कृष्णकुमार श्रेष्ठ श्रम, रोजगार तथा सामाजिक सुरक्षा, महेश्वरजंग गहतराज युवा तथा खेलकूद मन्त्री नियुक्त जुगु खः।

मन्त्रिपरिषद विस्तार जुइ न्ह्यः न्हापा कानुन, न्याय तथा संसदीय मामिला मन्त्री जुम्ह मन्त्री ज्ञानेन्द्रबहादुर कार्कीयात सञ्चार तथा सूचनाप्रविधि मन्त्री दयकूगु दु।

Categorized in राष्ट्रिय