नाइजेरियाया उत्तरी राज्य कानोय् छगः डुगा फातापूबलय् मस्तलिसें म्ह्वतिं २९ सीगु दुसा न्हय्म्ह जिवित हे उद्धार याःगु दु ।

धार्मिक ज्याझ्वलय् ब्वति कायेत वनाच्वंपिं मनूत गयाच्वंगु नांचा खुसि छीगु झ्वलय् फातापूगु संचारमाध्यमतय्सं न्ह्यथंगु दु । सीपिंलय् आपाःधइथें ६दँनिसें १२दँया स्कुले मस्त लाःगु दु ।

क्षमता स्वयां अप्वः यात्रु तःगु व खराब मौसमया हुनिं दुर्घटना जूगु धाःगु दु । उद्धार याःपिन्त अस्पताल यंकूगु सुरक्षाकःमिं धाःगु दु ।

नांचाय् ५० स्वयां अप्वः यात्रु गयाच्वंगु दुगु खः । खुसिइ तनाच्वंपिन्त मालाच्वंगु दनिगुलिं सीपिनि ल्याः थहांवनेफुगु धाःगु दु ।

Categorized in अन्तर्राष्ट्रिय