नागरिकता अध्यादेश जारी
कछलाथ्व त्रयोदशी ११४१,जेष्ठ १० सोमवाः
राष्ट्रपति विद्यादेवी भण्डारीं नागरिकता सम्बन्धि अध्यादेश जारी यानादीगु दु ।
मन्त्रिपरिषद्या सिफारिसय् राष्ट्रपति भण्डारीं संविधानया धारा ११४ उपधारा १ कथं नेपाल नागरिकता (न्हापांगु संशोधन) अध्यादेश २०७८ जारी यानादीगु दु । अध्यादेश कथं जन्मसिद्ध नागरिकया मांअबु निम्हं नेपाली नागरिक जूसा वंशजया लिधंसाय् नागरिकता बीदइगु जूगु दु ।
वंगु बिहिवाःच्वंगु मन्त्रिपरिषद्या मुँज्यां अध्यादेश हयेगु निर्णय यानाब्यूगु दु । अथेहे अबुया पहिचान मजूपिं सन्तानयात न मांया नामं वंशजया नागरिकता बीगु प्रावधान आःया अध्यादेशय् दु । २०७५ साल साउनय् हःगु नागरिकता ऐन संशोधन सम्बन्धि विधेयक राज्य व्यवस्था समितिइ थानाच्वंगु दनि । तर सरकारं जनता समाजवादी पार्टीया माग कथं थ्व अध्यादेश हःगु दु ।
संविधानया धारा ११ उपधारा (३) य् आःया संविधान जारी जुइन्ह्यः जन्मया लिधंसाय् नेपाःया नागरिकता चूलाकूपिं नागरिकया सन्तानं अबु व मां निम्हं नेपाली नागरिक जूगु अवस्थाय् सन्तानयात वंशजया नागरिकता बीगु व्यवस्था दु ।
Categorized in राष्ट्रिय
