नागरिकया नैसर्गिक अधिकारया सम्मान व संरक्षण यायेत मानव अधिकार आयोगया इनाप
लहनान्युज | ने.सं. ११३९ बछलागा अष्टमि (२७ मे, २०१९), सोमबाः
राष्ट्रिय मानव अधिकार आयोगं ग्याचिकु मदुगु लकसय् म्वाय् दइगु नागरिकया अधिकार संरक्षण यायेत सरकारयात इनाप याःगु दु ।
येँलिसें देशया थीथी थासय् म्हिगः व थौं जूगु विष्फोट, आगजनी व तोडफोडया घटनापाखें जूगु धनजनया क्षतियात कयाः थःपिनिगु गम्भीर ध्यानाकर्षण जूगु न्ह्यथसें आयोगं स्वतन्त्र व निर्भयपूर्वक वये वनेदइगु लकस दयेकेत सरोकारवालाया ध्यानाकर्षण याकूगु दु ।
आयोगं थौं सोमबाः विज्ञप्ति पिथसें देशया थीथी थासय् लूगु विष्फोटक पदार्थया हुनिं नागरिकयाके ग्याचिकुंया लकस ब्वलनाः स्वतन्त्र व निर्भयपूर्वक वये वनेत थाकुयाच्वंगु नं न्ह्यथनातःगु दु । नापं विप्लव पुचलं याःगु बन्दं जनजीवन झन्झन् थाकुया वनाच्वंगु न्ह्यथसें आयोगं थ्वपाखें मानवाधिकारया विश्वव्यापी घोषणापौ, नागरिक नापं राजनीतिक अधिकार सम्बन्धि अन्तर्राष्ट्रिय अनुबन्ध, अन्तर्राष्ट्रिय महासन्धि व नेपाःया संविधानय् न्ह्यथनातःगु सम्मानपूर्वक म्वायेदइगु नागरिकया अधिकार उल्लघंन जूगु ठहर याःगु दु ।
छुं नं विमति, द्वन्द्व वा संघर्षया स्थितियात संवाद व सहलहपाखें ज्यंकेफइगु धासें आयोगं बन्द निषेध व हिंसायात पूवंक हे वर्जित यानाः शान्तिपूर्ण लकसय् म्वाये दइगु नागरिकया नैसर्गिक अधिकारया सम्मान व संरक्षण यायेत सम्बन्धित पक्षयात इनाप याःगु दु ।
नापं बम विष्फोटय् लानाः सीपिनिगु छेँजःपिन्त पाय्छिकथंया राहत बीत, घाःपाः जूपिनिगु निःशुल्क व प्रभावकारी वासःया व्यवस्था यायेत व क्षति जूगु सम्पत्तिया मूल्यांकन यानाः राहत नापं क्षतिपूर्ति बीत तकं आयोगं सरकारयात इनाप याःगु दु ।
Categorized in राष्ट्रिय
