नातिबज्र विशेष ल्याः पिदन
लहनान्युज | चिल्लाथ्व तृतिया ११३८ (फ्रेअवरी १८ २०१८)
नेपालभाषाया नां जाम्ह साहित्यकार नातिबज्र बज्राचार्यया साहित्यिक च्वसु दुथ्यागु नातिबज्र विशेष ल्याः पितब्वज्या इलोहं प्रकाशन व नःलि साहित्यिक लय्पौया ग्वसालय् जूगु दु ।
येँया दगुबहालय् जूगु उगु ज्याझ्वलय् मूपाहाँ उपन्यासकार मथुरा सायमिं साहित्यकार नातिबज्र बज्राचार्ययात हनापौ लःल्हाःगु दुसा, मुँज्या नायः नरेश वीर शाक्यं दोसल्लां न्येकाः हना दीगु खः ।
ज्याझ्वलय् नेपालभाषाया थीथी विधाया साहित्यकारपिसं ब्वतिकयादीगु खः । नुगःखँ तयेगु झ्वलय् मूपाहाँ सायमिं नेपालभाषा ख्यलय् नातिबज्र ज्वःमदुम्ह नेपालभाषा साहित्यया नितिं समर्पित त्यागिम्ह व्यक्तित्व जूगु व नातिबज्रं नेपालभाषाया सफू मुंकेगु व मिइगु महत्वपूर्ण ज्याय् जीवन पाना च्वंम्ह जूगुलिं वय्कःयात हनेगु थुगु ज्या अतिकं च्वछाये बहःगु ज्या जूगु खँ कनादिल ।
नातिबज्रया योगदानयात राष्ट्रं हे हनेमाःगु खः, तर आःतक्क राष्ट्रया मिखा मवंनिगुलिइ मगाःमचाः प्वंकादीगु दु । नातिबज्रया हनाबना कथं नातिबज्र विशेष ल्याः निगू अंक पिथंगु लसकुस यायेबहःगु खँ नं कनादिल ।
अथेहे उगु ज्याझ्वलय् माणिक रत्न उराय्या ‘दोहलपा’ बाखं मुना रमा कर्णजितं खसभाषं भाय्हिलादीगु सफू मूपाहाँ सायमिं पितब्वया यानादीगु खः ।
ज्याझ्वलय् इलोहं प्रकाशनया दर्शनबीर शाक्यं लसकुश यानादीगु खःसा शशीकला मानन्धर न्ह्याकादीगु ज्याझ्वलय् साहित्यकार प्रमिला बज्राचार्य, किरण केन रञ्जित लगायतपिसं नुगः खँ तयादीगु खः ।
बुखँ नेवाः सुचना केन्द्र
किपा राजेन्द्र रंजित
