निक्वःगु नेपालभाषा साहित्य नखः क्वचाःल
लहनान्युज | थिंलागा अष्टमी ११३९ (दिसेम्वर ३० २०१८)
नेपालभाषा टाइम्सया ग्वसालय् निक्वःगु नेपालभाषा साहित्य नखःया छगु ज्याझ्वः दथुइ येँ महानगरपालिकाया मेयर विद्यासुन्दर शाक्य व यल महानगरपालिकाया मेयर चिरीबाबु महर्जनं मंकाः कथं उलेज्या यानादीगुु दु ।
रमेशकाजी स्थापितया सभापतित्वय् जूगु उगु ज्याझ्वलय् शताब्दी पुरुष सत्यमोहन जोशीं समालोचक इन्द्र मालीया ‘नेपालभाषाया यासुधुकू’ विमोचन न यानादीगु खःस जनकवि दुर्गालाल श्रेष्ठं भूषणप्रसाद श्रेष्ठया ‘१०१ छन्द व १०१ गजल’ व राजेन मानन्धरया उपन्यास ‘हलहल बुंगद्यः’या विमोचन जनकवि दुर्गालाल श्रेष्ठं यानादीगु खःसा । उगु कृतियात कयाः नेवाः न्ह्यलुवा लिसें उपन्यासकार मल्ल. के सुन्दरं समीक्षा यानादीगु खः ।
‘नेपालभाषाया मञ्चन कला’ विषयय् गोरखापत्र न्हिपौया पुलांम्ह प्रधान सम्पादक पुष्कर माथेमां सहजीकरण यानादीगु अन्तक्र्रियाय् ख्यालि जुजु मदनकृष्ण श्रेष्ठ, घिमिरे युवराज, कलाकार रामकृष्ण खड्गी व कलाकार हिसिला महर्जनपिंसं ब्वति कयादीगु खः ।
अथेहे मेगु अन्तक्र्रिया ज्याझ्वः ‘नेपालभाषा सफूया बजाः व्यवस्थापन’ विषयय् नेपालभाषा टाइम्सया सम्पादक सुरेश मानन्धरं सहजीकरण यानादीगु अन्तक्र्रयाय् कुतः पिकाकया विमल ताम्राकार, मण्डला बुक प्वाइन्टया माधवलाल महर्जन, बुक हिलया भूपेन्द्र खड्का व सफू प्रकाशनया सुभानी सिंहपिंसं ब्वति कयादीगु खः ।
उगु ज्याझ्वलय् २० म्ह साहित्यकारपिंसं थःपिनि रचना पाठ यानादीगु खः । ज्याझ्वःया लिपांगु ब्व कथं पद्मरत्न तुलाधरं च्वयादीगु अन्तिम ख्यालः ‘जातःगुरु’ सुरेश किरणं च्वयादीगु ‘ओम नमः शिवायः क्यनेगु ज्या नं जूगु खः । यलया भन्दाः क्यबय् जूगु उगु महोत्सवय् नेपालभाषाया सफू ब्वज्या लिसें नेवाः नसा ब्वज्या नं जूगु खः ।
Categorized in राष्ट्रिय
