श्रीलंकां निगूगु टी–ट्वान्टी क्रिकेटय् भारतयात बुकाब्यूगु दु । कोलम्बोय् वंगु चान्हय् श्रीलंकां भारतयात ४ विकेटं बुकूगु खः ।

भारतं ब्यूगु सच्छि व ३३ रनया आज्जु श्रीलंकां १९ ओभर ४ बलय् ६ विकेट तंकाः पूवंकल । श्रीलंकाया धनञ्जय डी सिल्भां ४०, मिनोद भानुकां ३६, वानिन्दु हसरङ्गां १५ अले चामिका करुनारत्नें १२ व अभिष्का फर्नान्डों ११ रन दयेकल ।

भारतया कुलदीप यादवं २ विकेट काल सा भुवनेश्वर कुमार, चेतन शाकरिया, वरुण चक्रवर्ती व दिपक चाहरं १÷१ विकेट काल । थ्वयां न्ह्यः न्हापां ब्याटिङ याःगु भारतं २० ओभरय् ५ विकेट तंकाः सच्छि व ३२ रन दयेकूगु खः ।

भारतया कप्तान शिखर धवनं दकले आपाः ४० रन दयेकूसां टिमयात त्याकेत मगात । भारतया देवदूत पडिकलं २९, ऋतुराज गायकवाडं २१ व भुवनेश्वर कुमारं १३ रन दयेकल ।

श्रीलंकाया अकिला धनञ्जयं २ विकेट कालसा दुश्मन्था चामिरा, डसुन शनका व वानिन्दु हसरङ्गां १÷१ विकेट काल । कासा त्याःगुलिसें श्रीलंकां ३ कासाया श्रृंखलाय् १–१ या ज्वलिंज्वः याःगु दु ।

न्हापांगु कासाय् भारत त्याःगु खः ।

Categorized in कासा