निरीह सरकार
- जुजुमान महर्जन
फागुणया अन्तय् भारतया सुरक्षा सैनिक बल, एसएसबीं नेपाःया कञ्चनपुर जिल्लाया आनन्दबजारय् कल्भर्ट दयेकेगु ज्याय् विवाद जुयाः जूगु ल्वापुइ गोलिं कयेकाः नेपाःया गोविन्द गौतमयात स्यानाबिल । व लिपा नेपाःया राष्ट्रियतायात कयाः नेपाःया थीथी दलं तसकं सः थ्वयेकल ।
सरकारया प्रवक्तालिसें सञ्चारमन्त्रीनिसें गृहमन्त्रींतकं उगु घटनाया छानबीन यानाः भारतं माफी फ्वनेमाःगु अभिब्यक्ति बिल सा भारतं क्षतिपूर्ति बीमाःगु खँ नं ल्ह्वन । आखिर उगु घटनाय् लानाः सीम्ह गौतमया परीवारयात क्षतिपूर्ति धाःसा आःतक नं मब्यूनि । उलि जक मखु, उगु घटनाया छानवीनया शुरुवाट तकं जूगु खः वा मखु, सी मदुनि ।
धात्थें धायेगु खःसा थजाःगु घटना बारम्बार जुया वयाच्वंगु दु । थुकिया सिकार नवलपरासीया सुस्ता बारम्बार धइथें जुयाच्वंगु दु । तर थजाःगु घटनायात कयाः सरकार गबलें नं गम्भीर जूगु खनेमदु । वहे नियतिं आः नं लिसा काःगु दु, आनन्दबजाःया घटना ।
थुगु घटना जूगु इलय् नेकपा एमाले मेची महाकाली अभियान न्ह्याकाच्वंगु खःसा एमाले सुदूर पश्चिमय् थःगु सभा न्ह्याकाच्वंगु खः । उगु इलय् नेपाःया राष्ट्रियताया नारा थ्वयेकुसें थुकिया जिम्मेबार भारतं कायेमाःगु व गोविन्द गौतमयात शहिद घोषणाया माग यासें पार्टीपाखें न्यागू लख तका बीगु घोषणा यात । अथेहे उगु घटनाय् घाःपाः जूपिनिगु वासः यायेगु जिम्मा नं पार्टी कायेत तयार दुगु उद्घोष यात । तर आः वयाः सुम्क हे दु एमाले ।
अथे हे थुगु घटनायात कयाः सरकारया प्रबक्ता, नापं माओवादी केन्द्रया नेता सुरेन्द्र कार्की नं ख्वपय् जूगु छगू ज्याझ्वलय् भारतं माफी फ्वनेमाःगु व थुकिया क्षतिपूर्ति बीमाःगु खँ ल्ह्वन । पार्टीपाखें गोविन्द गौतमया छेँजःपिन्त एमाले स्वयां छपलाः न्ह्यःने वनाः खुगू लख तका बीगु घोषणा यात ।
मेखे नकतिनि हे जक नेपाली कांग्रेसया नेता लिसें गृहमन्त्री विमलेन्द्र निधि नं घटना जूगु थाय्या अवलोकन यानाः शहिद गौतमया छेँय् वनाः छेँजःपिन्त झिगू लख तका धेबा बीगु ज्या जुल नापं नेपाली कांग्रेसपाखें मुंकूगु न्हय्गू लख तका नं लःल्हात। थ्व हे झ्वलय् गृहमन्त्री निधिं थुकियात कयाः भारतं छानवीन यानाः क्षतिपूर्ति बीकेगु नितिं पहल जुयाच्वंगु खँ कनादिल ।
थनथाय् छगू सञ्जोगया खँ धायेमाः, नेपाःया मूमू दलपाखें छेँजःपिन्त धेबाः लःल्हानाः सान्त्वना बीगु ज्या यात। छखें स्वयेगु खःसा पार्टीपाखें अप्वः धेबा बियाः सम्मान याःगु खनेदु । तर खँ पार्टीपाखें शहिदया छेँजःपिन्त धेबा लःल्हायेगु स्वयां नं नेपाःया स्वाभिमानय् न्ह्यसः थनीपिं भारतीय पक्षपाखें माफी फ्वंकाः उचित क्षतिपूर्ति बीगु खः व हाकनं थजाःगु घटना दोहरे मजुइमा धकाः सचेत याकेगु खः ।
तर थुकियात कयाः छक्वः ततःसलं हालाः जकं ज्या जुइमखु, थुकिया नितिं कुटनीतिक पहल यायेमाः, नापं राष्ट्रियताप्रति चिन्ता काइगु दलं दबाबया वातावरण तयार यायेमाः, तर व पक्ष धाःसा फुक्क सुम्क हे च्वनाच्वंगु खनेदु । मात्र आश्वासन बीगु ज्या जक जूगु दु । अले छगू न्ह्यसः नं ब्वलंगु दु, क्षतिपूर्ति सरकार व ततःधंगु दलतय्सं बीगु खः वा घटनाया दोषीयात माफी फ्वंकाः क्षतिपूर्ति बीकेगु खः, उकिया नितिं पहल यायेगु खः ? थुकिया लिसः मालेत बाध्य यानाब्यूगु दु ।
