निर्वाचनया विरोधय् आन्दोलनया घोषणा
लहनान्यूज | चौलागा पंचमी ११३७ (अप्रिल १६ २०१७)
वइगु बैसाख ३१ गतेया नितिं घोषणा जूगु स्थानीय निर्वाचनया विरोधय् मधेसी मोर्चा व संघीय गठवन्धनं आन्दोलन घोषणा याःगु दु ।
संघीय गठबन्धन व मोर्चां थौं येँय् पत्रकार सम्मेलन यासें स्थानीय तहया निर्वाचन याकेमबीगु धासें आन्दोलनया ज्याझ्वः घोषणा याःगु खः । स्वायत्त, संरक्षित व विशेष क्षेत्रयात मान्यता मब्युसे स्थानीय तगिंया चुनाव घोषणा याःगु थःपिन्त मान्य मजूगु धासें मोर्चां स्थानीय निर्वाचन याकेमबीगु धाःगु खः ।
मोर्चांं निर्वाचनयात लिच्वः लाकेगु कथं वइगु बैसाख ५ गतेनिसेंया आन्दोलनया थीथी ज्याझ्वः सार्वजनिक याःगु दु । आन्दोलनया ज्याझ्वः कथं बैसाख ५ गते जिल्ला सदरमुकामय् मसाल जुलुस याइगु जूगु दु ।
अथे हे ७ गते लाठि जुलुस पिकायेगु लिसें ८ गतेनिसें १२ गतेतक्क थीथी थासय् आमसभा यायेगु न्ह्यथंगु दु । व धुंकाः बैसाख १२ निसें २७ गतेतक्क क्षेत्रीय स्तरया बन्द व लाठि अले मसाल जुलुसया ज्याझ्वः हःगु दु ।
२७ गतेलिपा धाःसा चुनावयात लक्षित यानाः आमहड्तालया घोषणा याःगु दु । चुनावया नितिं उम्मेदवारी दर्ता यायेगु दिं बैसाख १६ गते धाःसा बन्द याइगु जूगु दु ।
Categorized in राजनीति
