निशिला शाक्य
– विजयरत्न असंबरे
“नेपाःया युवा सीप नेपाःया नितिं हे छ्यलेमाः, अले जक युवावर्गं सय्कूगु सीपया सदुपयोग जुल धकाः धाय् थाय् दइ ।”
“डान्स धइगु प्याखं हुलेगु खः, तर ल्हाः संकेगु वा म्ह संकेगुयात जक डान्सधकाः धाय्मज्यू । थ्व छगू कला खः, उकिं थुकी कलात्मकता दय्माः । अथे जुयाः हे थौंकन्हय् डान्सयात “कोरियोग्राफी” धकाः धाय्गु यानाहःगु खः ।”
हुलाप्याखं यानि कि डान्सयात कयाः थ्व दुग्यंगु बिचाः प्वंकादीम्ह निशिला शाक्य खः । नीन्यादँया वैंशय् क्यंम्ह निशिला थौंकन्हय् एपीवन टिभिइ वयाच्वंगु“बुगीवुगी” नांयागु डान्स रियालिटी शोलिसे स्वापू दुम्ह मय्जु खः । थ्व “बुगीवुगी”ज्याझ्वलय् रोहीया महर्जन, प्रशान्त तामाङ्ग व नरेशबीर सिंहनापंयानाः स्वम्ह कोरियोग्राफरपिन्सं मू भूमिका म्हिता वयाच्वंगु दुसा उकी मध्ये नरेशबीर सिंहया पुचलय् च्वना एसिस्टेण्ट कोरियोग्राफर जुयाः ज्या याना वयाच्वंम्ह निशिला शाक्य धइम्ह झी संगीतकार नील शाक्यया म्ह्याय् खः । छम्ह संगीत सर्जकया म्ह्याय् जूगुलिं वयागु परिवार कलाकारिताय् नुगः क्वसाःपिं खः धइगु याउँक हे क्यं ।
मचाबलय्निसें डान्स धाल कि हुरुक्क हे जुइम्ह निशिलां टिभिइ वःगु डान्स स्वया स्वयाः हे डान्सया न्हापांगु ज्ञान हासिल याःगु खः । मचाबलय् प्याखं हुलेगु धाल कि निपलाः न्ह्यचिलीम्ह जूगु व वंवंथाय् लकस हे संगीतमय जुइगु खः । विशेषयानाः पाजुपिन्थाय् वनीबलय्् थःथितिपिन्सं वयात प्याखं हुइकीगु खःसा व नं छु कम धकाः प्याखं हुलेदत कि ला म्वालका, घौबाघौतक याउँक हे प्याखं हुलाच्वनीगु जुयाच्वन । मचाबलय्या थ्वहे पहलं वयात थौं छम्ह प्रतिभाशाली कोरियोग्राफरया रुपय् न्ह्यःने थने हःगु दु ।
छुं ई तिनि हे जक निशिलां नेपाःया नांजाःम्ह म्येहालामि देबिका बन्दनाया हिन्दि म्ये “अब दिल जरा जरा”या म्युजिक भिडियोया नं कोरियोग्राफी यानादीगु खः । थ्व म्ये भारतया नांजाःगु कम्पनी भेनसपाखें रिलिज याःगु खः । थुकथं नच्चागु वैंशय् छम्ह कोरियोग्राफरया रुपय् थःगु न्हाय् धस्वाकेत ताःलाःम्ह निशिला शाक्य थनतक याउँक थ्यंगु धाःसा मखु । उकिया नितिं चान्हि मधासे साधना याःगु दु ।
न्यादँ स्वयां अप्वःला भारतय् च्वनाः नृत्यकलाया अध्ययन यानादीगु दु । वय्कलं धयादी, “प्याखं हुले सय्केत सायद उलि थाकु मजू जुइमाः, तर नृत्य दुने दुबिनाच्वंगु कलात्मकता आत्मसात याय्त छगू साधना माः । आत्मविश्वास माः । धैर्यमाः । थौंया कन्हय् हे जुइमखु ।”
थः अबु नं कलाख्यलय् हे भ्यलेपुंम्ह नांजाःम्ह लय् चिनामि जूगुलिं थःत थ्व ख्यलय् पलाः न्ह्याकेत अःपूगु खँ न्ह्यथनादीम्ह निशिलां नाईटिंगेल उच्च माध्यामिक विद्यालयस आखः ब्वनादीगु खःसा स्कूलया इलंनिसें हे हुलाप्याखंपाखे थःगु पलाः न्ह्याकेगु शुरु यानादीगु खः ।
निशिलां स्कूलय् आखः ब्वनाच्वंगु इलय् हे टिभी वइगु “डान्स रियालिटी शो” स्वयाः उकथं थःम्हेसिनं छेँय् न्हाय्कं न्ह्यःने च्वनाः डान्स याय्गु कुतः यानादीगु खः । उगु इलय् विशेष यानाः
हिन्दी च्यानलय् वइगु “डान्स इण्डिया डान्स” नांयागु रियालिटी शो खनाः प्रभावित जुयादीम्ह निशिला अजाःगु रियालिटीया जज रेमो डि’सुजाया पहःचहः खनाः प्रभावित जुयादीगु खः ।
लिपा निशिलां रेमोया जीवनी नं ब्वनादिल । जीवनी ब्वनेधुंकाः ला रेमोयात वं थः आदर्श पुरुष हे भाःपियादिल । मचाबलय् वं थथे याःगुया लिच्वःकथं लिपा वनाः वयागु जीवनय् रेमो
थेंजाःम्ह भारतया तसकं नांजाःम्ह कोरियोग्राफरलिसे ज्या नं याय्गु ह्वःताः चूलात ।
स्वअध्ययनं हे नृत्यकलायाबारे ज्ञान कयाः पलाः न्ह्याकादीम्ह निशिला शाक्यं झिगू तगिंतकला हुलाप्याखंयात शोखया रुपय्जक कयाच्वंगु खःसा एसएलसी पास जुइवं कलेज जीवन शुरुयानादीबलय् अर्जुन गौतम नांयाम्ह कोरियोग्राफरलिसे दकलय् न्हापांखुसी औपचारिककथं ज्ञान काय्गु शुरु यानादीगु खः । अनंलिपा निशिला भारतया बेंगलोरय् “अट्टकलरी सेण्टर फर मुभमेंट आर्ट” नांयागु स्यनेकुथी वनाः डान्सय् डिप्लोमा यानादिल ।
अन ब्वनेगु झ्वलय् हुलाप्याखंया म्यूजिकल थिएटरया रुपय् दुग्यंक्क ज्ञां कयादिल । नृत्यकलाया छगू छगू पक्षयात कयाः दुग्यंक अध्ययन यानादी धुंकाः निशिला बलिउड धकाः नांजाःगु मुम्बई फिल्म नगरीपाखे स्वयाः वनादिल । अन वं श्यामक डाबरलिसे निदँ नापं सहायक जुयाः ज्यायानादिल ।
थ्व निदँदुने “जाने जिगर” नांयागु “म्यूजिकल थिएटर” नं यानादिलसा निशिलां थः आदर्श भाःपियातःम्ह रेमो डि’सुजालिसे म्यूजिकल एडय् नं ज्यायाय्खन । थुकथं नच्चागु वैंशनिसें हे थःत नृत्य कलाकारिताय् समर्पण यानादीम्ह निशिलां नेपालय् आपालं ज्याझ्वलय् थःगु हुलाप्याखंया कला न्ह्यब्वयादी धुंकूगु दु ।
“नृत्यकला धइगु छगू तसकं तःब्यागु ख्यः । थन आपालंआपाः प्रतिभावान मनूत दु । अले छम्हथें मेम्ह गबलें जुइमखु । जिं याःथें मेम्हेस्यां याइमखु वा याय् फइमखु, अले मेम्हेस्यां याःथें जिं याय् फइमखु । थ्व खँयात थुइकाः छम्ह कलाकारया प्रतिभायात गुकथं न्ह्यब्वय्फइ धइगु खँय् न्ह्याबलें ध्यान तयाः च्वनेफत धाःसा जक थः सफल जुइफइ ।” धकाःदुग्यंगु बिचाः प्वंकादीम्ह निशिला शाक्यया विचाःकथं थौंकन्हय् थीथी त्वहः चिनाः नेपाःया ल्याय्म्हत विदेशय् पलायन जुयाच्वंगु खं तसकं नुगः मछिंकादी । वय्कःया विचाःकथं विदेशय् सीप सय्केज्यू, तर व अन सय्काःगु सीप अन हे मी मज्यू । नेपालय् वयाः छ्यलेमाः धइगु खनेदु ।
निशिला नेपालय् च्वनाः नृत्यकला ख्यलय् थःगु सीप व कला न्ह्यब्वय्गु मती तयाच्वनादीम्ह युवा प्रतिभा खः । “थःगु भविष्य नेपालय् हे बांलाःगुलिं विदेशय् वनाः सीप म्यूवने मखु ।” धकाः क्वःछिनादीम्ह निशिलां फ्रान्सं नेपाल वया च्वनाच्वंम्ह एलिज ब्यान्सीं चाय्कातःगु “सोलिस पर्फमेण्स आर्टस्”लिसे जानाः नेपालय् नृत्यया कलात्मकतायात कयाःथःम्हेसिनं नं सय्केगु व सःगु ज्ञान थन हे मेपिन्त नं स्यनेगु ग्वसाः ग्वयाच्वंगु दुसा विदेशय् वने हे माःसां अन ज्ञान काय्त वा प्रतिभा न्ह्यब्वय्तजक वनेगु, अले थन हे लिहां वयाः नृत्य कलाया विकासय् न्ह्यज्याय्गु बिचाः निशिला शाक्यं प्वंकादीगु दु ।
