निषेधाज्ञा अझ कडा यायेत गृहया उजं
लहानान्युज | कछलाथ्व एकादशी ११४१,जेष्ठ ८ सनिवाः
सरकारं सर्वसाधारणपिं निषेधाज्ञा उल्लंघन याना सतकय् मवयेकेत ७७गू जिल्लाया प्रमुख जिल्ला अधिकारी व स्वंगु हे सुरक्षा अधिकारीपिन्त परिपत्र याःगु दु ।
नेपाल प्रहरी, शसस्त्र प्रहरी व राष्ट्रिय अनुसन्धान विभागया प्रमुखपिन्त शनिबाः गृहमन्त्रालय सःता गृहसचिव महेश्वर न्यौपानें निषेधाज्ञायात कडा यायेत उजं बिउगु खः ।
अथेहे सचिवया उजं लिपाः मन्त्रालयं दक्व जिल्ला प्रशासन ज्याकूयात परिपत्र याना गुनं हालतय् सर्वसाधारणपिन्त छेँय् पिहाँ वयेके मबिइत उजं बिउगु दु । गृहप्रवक्ता जनकराज दाहालं निषेधाज्ञाया समीक्षा यासें अझ प्रभावकारी यायेत उजं बिउगु धयादिल । येँया प्रमुख जिल्ला अधिकारी कालिप्रसाद पराजुलीं मत्रालयं थ्वहे वाः न्ह्याःगु कोभिड संकट व्यवस्थापन अध्यादेशया प्रभावकारी कार्यान्वयनया लागि उजं वःगु धयादिल ।
अध्यादेश प्रभावकारी कार्यान्वयन यायेत निषेधाज्ञायात कडा यायेगु सीडीओ पराजुलीया धापू खः । मास्कया छ्यलिगु, होल्डिङ व कसूरया व्यवस्थायात कार्यान्वयन याना अध्यादेशयात न्ह्याकेत मन्त्रालयं उजं वःगु वय्कलं धयादिल ।
उजंकथं हे येँ स्वनिगःया निषेधाज्ञायात अझ कडा यायेत येँ जिल्ला प्रशासनया योजना खः । राष्ट्रपति ज्याकूथिं विहीबाः कोभिड १९ संकट व्यवस्थापन यायेत अध्यादेश हःगु दु । गुकिइ स्वास्थ्य आपतकालनिसें युनिफाइड अस्पताल निस्वनेगु तक्कया प्रावधान कःघानातःगु दु ।
अथेहे सार्वजनिक थासय् मास्क मतपिन्त नं सच्छि ध्येबा जरिवाना यायेगु, ज्याः मदयेक पिहाँ वःपिन्त निसः ध्येबा जरिवाना यायेगु धाःगु दु । अनुमति कयाः वा ल्वगि ल्हेगु ज्या बाहेक सवारी साधन चले याइपिन्त नं कारबाही यायेगु धाःगु दु ।
थुजागु अवस्थाय् निगू पाङ्ग्राया सवारी साधनयात निद्वः व मेगु सवारी साधनयात न्याद्वः तकाः ध्येबा जरिवाना पुइकेफइगु धाःगु दु । येँ स्वनिगलय् जेठ १३ गतेतक्क निषेधाज्ञा लागू यानातःगु दु ।
