नीतिगत समस्याया मारय् जनजाती संकिपा
लहनान्यूज | दिल्लाथ्व द्वितीया ११३७ (जुन २५ २०१७)
आदिवासी जनजाति चलचित्र महासंघया ग्वसालय् येँय् स्वन्हुयंकया आदिवासी जनजाति संकिपा महोत्सव जुइगु जूगु दु ।
थौं महासंघं येँय् पत्रकार सम्मेलनया ग्वसाः ग्वसें वइगु असार १७, १८ व १९ गते येँया भृकुटि मण्डपस्थित नेपाल पर्यटन बोर्डया हलय् महोत्सव जुइत्यंगु जानकारी बिल ।
स्वन्हुया महोत्सव दुने थीथी आदिवासी जनजाति समुदायया मुक्कं १८ संकिपा क्यनीगु जूगु दु ।
महोत्सवय् गुरुङपाखें न्यागू, राई, मगर व नेवाःपाखें निगू निगू अले माझी, मुगाल, राजवंशी, नागा, लिम्बु, थारु व तामाङ समुदायया छगू छगू संकिपा क्यनेगु महासंघं न्ह्यथंगु दु ।
महोत्सवय् क्यनीगु दक्वं संकिपामध्ये छगूयात २५द्वः तकालिसें पब्लिक च्वाइस अवार्ड नं बीगु महासंघं जानकारी बिल । मेगु दक्वं संकिपायात प्रोत्साहन कथं ५द्वः तका बीगु नं महासंघं न्ह्यथंगु दु ।
आन्दोलनया निरन्तरता कथं महोत्सव
पत्रकार सम्मेलनय् न्वःवासें महासंघया नायः अमृत सुनुवारं समृद्ध नेपाल दयेकेत आदिवासी संकिपां महत्वपूर्ण म्हिताच्वंगु दुसां सम्बन्धित निकायं थुकियात माःगु च्यूताः मतःगु धयादिल ।
लिसें नायः सुनुवारं जनजाति संकिपाया इतिहास २५दं मयायेधुंकलं नं नीतिगत समस्याया हुनिं थुकिया विकास बिचाः याःकथं जुइमफयाच्वंगु धयादिल ।
आःया सेन्सर बोर्ड आदिवासी जनजाती संकिपा अनुकूल मजूगु धासें थःपिन्सं बिस्कं हे आदिवासी जनजाति संकिपा सेन्सर बोर्डया माग यानाच्वनागु सुनुवारया धापू खः ।
आदिवासी जनजाति संकिपाया माग सम्बोधन याकेत थःपिन्सं न्ह्याकाच्वनागु आन्दोलनया निरन्तरता कथं नं थुगु महोत्सव यायेत्यनागु वयकलं धयादिल ।
संकिपा महोत्सवया कजि युवराज मास्कीं आदिवासी जनजाति संकिपाकःमिपिनिगु क्षमता अभिबृद्धिलिसें थुकिया बजार तःधंका यंकेगु नितिं नं थुगु महोत्सव जुइत्यंगु धयादिल ।
Categorized in मनोरन्जन
