नीति लिसें ज्याझ्वः व बजेटबारे सहलह यायेत मेयर शाक्य वडा वडाय्
लहनान्यूज | बछलागा एकादशी ११४१, जेष्ठ २४ सोमबाः
येँ महानगरपालिकाया प्रमुख विद्यासुन्दर शाक्यं वइगु आर्थिक दँ २०७८–०७९ या नीति लिसें ज्याझ्वः व बजेट निर्माणया झ्वलय् ३२गु वडाया जनप्रतिनिधिलिसे वडाय् हे थ्यंका राय सुझाव कायेगु धयादिल । राष्ट्रिय सभागृहलय् च्वंगु ६१गू कार्यपालिका मुँज्याय् सम्बोधन यासें प्रमुख शाक्यं थथे धयादिगु खः ।
“झिगू कार्यकालया थ्व लिपांगु नीति लिसें ज्याझ्वः व बजेट खः”, शाक्यं धयादिल, “यँे महानगरपालिका क्षेत्र दुने जूगु विकास निर्माणया ज्याया अनुगमन व मतदाता पिनिगु खँ न्यनेगु व सुझाव बिइगु सिलसिलाय् जी यक्वः हे पटक वडा–वडा वना । थुगुसी नं बजेट दयेकेत दक्व वडाया जनप्रतिनिधिलिसे राय सुझावलिसें वइगु आर्थिक दँ २०७८–७९ या नीति लिसें ज्याझ्वः व बजेट निर्माणया योजना दयेकेगु जुई ।”
उगु झ्वलय् प्रमुख शाक्यं दक्वः वडाध्यक्षपिन्त वडा समितिया मुँज्याय् ई क्वजिना सःतेत नं इनाप यानादिल । असार २गते निसें यँ महानगरया ९क्वःगु अधिवेशन न्ह्याय्त्यंगु दु । अधिवेशन न्ह्यः हे थःथःगु वडाया विकास निर्माणया लागि नीति लिसें कार्यक्रम व बजेटय् छु छु ज्या दुथ्याकेगु खः दक्वः वडावासीपिंलिसें सहलह याना योजना दयेका हयेत नं मेयर शाक्यं इनाप यानादिल ।
शाक्यं ईलय् हे योजना दयेका महेगु, अले लिपाः जिगु वडा योजनाय् मलात धकाः कुँख्यना यायेगु अवस्था मजुइमा धका थुजागु योजना दयेकागु नं धयादिल ।
अथेहे शाक्यं मेमेगु महत्वपूर्ण मुँज्याय् न आवश्यकताया लिधंसाय् सहलह न्ह्याकेत थः तयार जूगु जानकारी बियादिल । प्रमुख शाक्यया नायसुई च्वंगु ६१क्वःगु कार्यपालिका मुँज्यां कोभिडया संक्रमण म्हो व रोकथाम व नियन्त्रणया लागि यानावयाच्वंगु ज्यायाबारे नं समीक्षा यानादिगु खः ।
मुँज्याय् कोभिडया महामारी व्यवस्थापनया लागि यानागु ज्याया बारे कार्यपालिकाया दुजःपिन्सं न्ह्यब्वःगु जिज्ञासाया लिसः प्रमुख शाक्यं बिउसें मानवीयता व मानव जीवन रक्षाया न्ह्यसःलय् यायेगु छुं नं ज्याः निशर्त जुई । झिसं थुगुसी नं सरकारी व सामुदायिक अपस्तालया क्षमता विकासय् ग्वहालि याना । थ्वः निशर्त ग्वहालि खः, धयादिल । मुँज्याय् सिटी लाइव्रेरी न्ह्याकेत व व्यवस्थापन कार्यविधि व सम्पदामैत्री भवन निर्माण मापदण्ड लिसें सहुलियत कार्यविधि २०७८ न्ह्याकेत सहमति बिउगु दु । उगु कार्यविधि विधानय समितिपाखें कार्यपालिका मुँज्या जुया नगरसभाय् पेश जुई । मुँज्याँ जुड हलय् सौर्य मतः तयेगु ज्याया नितिं म्याद थप यायेगु, त्रिलोक संरचनां तःगु ३९गू बस स्ट्याण्डया ५दँया नितिं ९०गू लखः रोयल्टी क्वछिना म्याद थप यायेगु निर्णय याःगु खः ।
थ्वहे दथुई पूर्वाधार क्षेत्रया थीथी वडाया धः व सतक दयेकेत याःगु बोलपत्रय् मदुगु ज्याया भेरिएसन व वडा नं. ८ या खरीबोटया सतकर्माय् सतक व धः निगूलिं ज्याया नितिं बोलपत्र जूसां स्थानीयपिन्सं सतक जक दयेकेत माग जुसेंलि धः मदेकेगुया म्हो ध्यबाःया भेरिएसन स्वीकृत याःगु दु ।
