२०८० चैत्र १६, शुक्रबार

नुगस्चु

पुष्परत्न तुलाधर
 
ज्याकुथिं जि छेँय् लिथ्यनी,
जिगु छेँया नुगःचु
समाः याना वसः तिया
जिगु क्वथां पिहांवइ ।
 
जिलिसे पलख जक हे
त्वःफीगु ग्याचिकुं
जिगु ल्यू न्ह्यः हिला जुइ
सखे व जिगु हे किपालु ।
 
न्हिच्छि याकः उकुस मुकुस
म्हाइपुक वाःकाः तया
जिगु हे लँ स्वया
आय्बुइका च्वंम्ह व
 
थःगु म्हया झ्यातु
जिगु ब्वहः हे यातुक दिका
व अति हे चंचं धाइ,
याउँक सासः फी ।
संन्ह्याकाः ई भुतुलिं
हा कनावःगु कफिया
मगमग नँ जितः न्ह्यच्याकी,
जितः कसिक्क घय्पुइ
घुर्रर घुर्रर न्ह्यलं ब्वाइ ।
 
न्हिच्छि पिनेया ज्यां याताप्याता
वंक न्यःम्ह जि स्वयां नं 
गबाय्सं त्यानु चाय्की व
सखे जिगु हे बच्छि म्हगः ।