नृत्य निर्देशकया उद्घोषण तालीम क्वचाल
लहनान्यूज | ११३८ पोहेंलाथ्व पंचमि (डिसेम्वर २३, २०१७) यल
नृत्य निर्देशन थुज्वःगु श्रृजनात्मक ज्याय् संलग्न नृत्य निर्देशकपिं न्वःवायेगु ख्यलय् न्ह्यःने वये मफुबलय् राज्यतक्क थःगु खँ नं थ्यंके मफयाच्वंगु नृत्य निर्देशकपिन्सं धाःगु दु ।
नृत्य निर्देशक संघ नेपाल, यल कचाया ग्वसालय् जूगु छवाः यंकया उद्घोषण कला तालीमया समापन समारोहया वक्तापिन्सं थःगु खँ, थःगु समस्या सम्बन्धित थासय् बांलाक तयेफयेकेत न्वःवायेगु कला नं दयेमाःगु खँय् बः बिल ।
ज्याझ्वलय् नुगः खँ तयेगु झ्वलय् नृत्य निर्देशक संघ नेपालया केन्द्रिय मू छ्यान्जे नृपध्वज खत्रीं गुलिखे थासय् न्वःवायेमसः धाधां नृत्य निर्देशक थःपिन्सं हे थःत ल्यूने घ्वानाच्वंगु धयादिल । हरेक कार्यक्रम वा गतिविधिइ मेमेगु ख्यःया कलाकार, प्राविधिकपिन्त न्वःवायेत दबू उपलब्ध याकीगु अवस्थाय् नृत्य निर्देशकपिन्त धाःसा न्वःवाकेगु आवश्यकता हे महसूस मयाइगु खँय् खत्रीं कुंखिनादिल । माःथाय् माःकथं न्ह्याःवनाः थःगु नुगः खँ तयेफइगु अवस्थाय् राज्यं नं थःपिनिगु समस्याय् ध्यान बीगु खँय् खत्रीं बः बियादिल । उद्घोषण तालीमया प्रशिक्षक बिराजकाजी राजोपाध्यायं नृत्य निर्देशन थुज्वःगु श्रृजनात्मक ज्याय् संलग्न कलाकारपिन्सं सफल वक्ता वा उद्घोषक जुइगु बिचाः तःगु तसकं सकारात्मक विषय खःगु धयादिल । ललितपुर उद्योग वाणिज्य संघया न्वकू रुपकुमार शाक्यं हरेक ख्यलय् संलग्न व्यवसायी, पेशाकर्मी सकसिनं न्वःवायेगु कला सयेका हे तयेमाःगु खँय् बः बियादिल ।
यल महानगरपालिका वडा नं. ५ या वडाध्यक्ष विकासमान श्रेष्ठं हरेक ख्यलय् न्वःवायेगु कलाया आवश्यकता दइगु खँय् बः बियादिल । थःगु वडाबासीपिन्त नं उद्घोषण कलाया तालीम न्ह्याकेगु योजना वडाध्यक्ष श्रेष्ठं न्ह्यःने तयादिल । अथे हे संघया केन्द्रिय न्वकू संजय शर्मा राजोपाध्यायं संघया थीथी गतिविधि व योजनाया बारे जानकारी बियादिल । संघ यल कचाया नायः स्वजन रघुवंशीं यल कचाया भावी योजनाया जानकारी ब्युसें आः संस्थापाखें ताल सम्बन्धि कार्यशालाया ग्वसाः ग्वयेगु धयादिल । लिसें नायः रघुवंशीं संघं चर्या प्याखं सम्बन्धि हे थःगु ध्यान केन्द्रित यानाः न्ह्याःवनेगु नं धयादिल ।
समापन समारोह तालीमय् दुथ्याःपिं सकल प्रशिक्षार्थीपिन्त यल महानगरपालिका वडा नं. ५ या वडाध्यक्ष विकासमान श्रेष्ठं दसिपौ लःल्हानादिल । लिसें वडाध्यक्ष श्रेष्ठं प्रशिक्षक बिराजकाजी राजोपाध्याय व तालीमया नितिं थाय् उपलब्ध यानाब्यूम्ह प्रगती आदर्श ब्वनेकूया प्रधानाध्यापक रमेश शाक्ययात मतिनाया चिं नं लःल्हानादिल ।
ज्याझ्वलय् संमुक्ता शर्मा राजोपाध्यायं मन्जुश्री हुलाप्याखं अले राजीब बज्राचार्य, सुनिता महर्जन व श्रृजना माया तामाङपाखें नेवाः हुलाप्याखं नं न्ह्यब्वःगु खः । संघ यल कचाया छ्यान्जे अनुप शाक्यं लसकुस यानाद्यूगु ज्याझ्वलय् दांभरिं मजुना डंगोलं सुभाय् देछानादिल ।
Categorized in मनोरन्जन
