नेकपापाखें खुगुलिं महानगरय् नायः व छ्याञ्जे मनोनित
सत्तारूढ नेपाल कम्युनिष्ट पार्टी (नेकपां) देय्न्यंकया खुगुलिं महानगरय् पार्टीया नायः व छ्याञ्जे मनोनित याःगु दु । 
 
थौं सञ्चरवाः न्हिनय् प्रधानमन्त्रीया सरकारी निवास बालुवाटारय् च्वंगु सचिवालय मुँज्यापाखें येँ महानगरया अध्यक्षय् निर्मल देउला व छ्याञ्जेय् रवीन्द्र श्रेष्ठयात मनोनित याःगु दु ।
 
पार्टी प्रवक्ता नारायणकाजी श्रेष्ठयाकथं यल महानगरय् मञ्जली शाक्य नायः व ज्ञानेन्द्र शाक्य छ्याञ्जेय् मनोनित याःगु खः । अथे हे, पोखरा महानगरय् दीपक पौडेल नायः व विश्वप्रकाश लामिछाने छ्याञ्जे, भरतपुर महानगरय् रामप्रसाद न्यौपाने नायः व ईश्वर सापकोटा छ्याञ्जेकथं ल्यःगु दु । 
 
सचिवालयया मुँज्यापाखें वीरगञ्ज महानगरय् रोहवर अन्सारी नायः व विश्वम्बर शर्मा छ्याञ्जे, विराटनगर महानगरय् सागर थापा नायः व हेम कार्की छ्याञ्जेकथं मनोनित याःगु प्रवक्ता श्रेष्ठं जानकारी बियादिल । 
 
प्रवक्ता श्रेष्ठं पत्रकारतलिसे खँल्हानादिसें ल्यंदनीगु सांगठनिक ज्या याकन हे च्वनीगु सचिवालयया मुँज्यां क्वःछीगु नं धयादिल ।
 
Categorized in राजनीति