नेकपा एमालेया कार्यदलया मुँज्या थौं नं च्वनीगु
बछलागा चतुर्दशी ११४१,असार २४ बिहीवाः
नेकपा एमालेया विवाद समाधान कार्यदलया मुँज्या थौं नं च्वनीगु जूगु दु ।
थ्वयां न्ह्यः सहलह जुइ ल्यं दुगु विषयस थौंया मुँज्याय् खँल्हाबल्हा जुइगु नेतातय्सं धाःगु दु । नेकपा एमालेया नायः केपी शर्मा ओली व वरिष्ठ नेता माधवकुमार नेपाल दथुइ म्हिगः वार्ता जूगु खः ।
लिपांगु इलय् नेकपा एमालेय् आन्तरिक विवाद च्वन्ह्यानाच्वंगु इलय् निम्हं नेता दथुइ ५६ न्हु धुंकाः खँल्हाबल्हा जूगु खः । थ्वयां न्ह्यः निगुलिं पक्षं सहलहया कुतः याःसां शीर्ष नेतातय् दथुइ वार्ता जुइमफयाच्वंगु खः ।
वंगु चैत २ गते एमालेया तत्कालीन पार्टी ज्याकू धुम्बाराहीलय्, वैशाख ८ गते होटल मेरियटय् व वैशाख ३० गते भुइजःसिइ ओली व नेपाल दथुइ वान टु वान वार्ता जूगु खः ।
म्हिगःया वार्ताय् पार्टी एकतायात गुकथं न्ह्यःने यंकेगु धइगु विषयस सहलह जूगु धाःगु दु । म्हिगःया मुँज्याय् शीर्ष नेतातय् दथुइ खँल्हाबल्हा सकारात्मक जूगु नेतातय्सं दावी याःगु दु ।
कार्यदलय् दुपिं नेतातय्सं एकताया लागिं थीथी कुतः न्ह्याकातःगु दु ।
Categorized in राजनीति
