नेकपा एमालेया वडा अधिवेशन थौंनिसें न्ह्याइगु
कौलागा तृतीया ११४१, कात्तिक ६ शनिबाः
नेकपा (एमाले) या १०क्वःगु राष्ट्रिय महाधिवेशन अन्तर्गत थौं देय्यंक वडास्तरया अधिवेशन जुइत्यंगु दु ।
वडा अधिवेशनयात नायः केपी शर्मा ओलीं भर्चुअल माध्यमं उलेज्या यानादीगु व इन्टरनेट पहुँच दूगु वडाया ज्याझ्वल् उकियात ‘डिस्प्ले’ यायेगु क्वजिउगु दु । एमाले केन्द्रीय ज्याकुथिं थौ कन्हय्या खुसिबाः चलःखं लिच्वः लाःगु जिल्लाय् धाःसा छुं ई लिपा अधिवेशन जुइगु न्ह्यथंगु दु ।
अथेहे थ्वहे कात्तिक ९ गते फुक्क पालिकास्तरय् अधिवेशन जुइत्यंगु दु । एमालें महाधिवेशनय् दुथ्याइपिं प्रतिनिधिया मापदण्ड क्वजिइत उगु पार्टीया थ्वहे कात्तिक ११ गते स्थायी कमिटी व १२ गते केन्द्रीय कमिटीया मुँज्या सःतूगु दु ।
वइगु मंसिर १० निसें १२ गते तक्कया एमालेया १०क्वःगु महाधिवेशन वाग्मती प्रदेशया चितवनय् जुइ । २०७७ चैत मसान्त तक्क पार्टी दुजः जूपिन्त महाधिवेशन प्रतिनिधि जुइत योग्य नालाकाःगु दु । चितवनय् जुइगु एमालेया महाधिवेशनय् निर्वाचन प्रयोजनया नितिं विद्युतीय भोटिङ मेशिन छ्यलेत्यंगु दु ।
एमालेया स्थायी कमिटीया शुक्रबाःया मुँज्यां महाधिवेशनया नितिं नेता रामबहादुर थापाया कजिसुइ गठित २१म्ह दुजःया मूल व्यवस्थापन समितिया सहसंयोजकय् स्थायी कमिटी दुजः सुरेन्द्र पाण्डे व सचिवय् विष्णु रिमालयात क्वजिउगु लिसें समितिया छुं दुजः थप याःगु दु ।
Categorized in राजनीति
