नेकपा एमाले आन्तरिक विवाद ज्यंकुसें १०गू बुँदे सहमति
लहनान्यूज | दिल्लाथ्व द्वितिया ११४१, असार २८ सोमबाः
नेकपा एमाले दुनेया विवाद ज्यंकेत निस्वंगु कार्यदलं १०गू बुँदे प्रस्तावय् सहमति जूगु दु ।
छवाः तक्क च्वंगु कार्यदलया मुँज्यां वंगु चान्ह्य् पार्टीयात छधि यायेत २०७५ जेठ २ गतेया केन्द्रीय समिति कायम यायेकथं सहमति जूगु खः । मुँज्यां सर्वोच्च अदालतं नेकपा खारेज याना नेकपा एमाले व नेकपा माओवादी केन्द्र हे जुबले पार्टीया नामय् जूगु दक्वः निर्णय खारेज यायेगु प्रस्तावय् सहमति जूगु दु ।
अथेहे निगू पार्टी जुइधुंका नेकपा एमालय् हे च्वनाच्वंपिं नेकपा माओावदी केन्द्रया नेतापिं नेपाल कम्युनिष्ट पार्टीइ च्वनाच्वंबलय्या पद व हैसियत दइकथं प्रस्ताव याःगु नेतापिन्सं धाल । अथेहे सर्वाेच्चय् विचारधानी मुद्दायात असर मजुइ जुइकथं गुगुनं ज्याखँ व धापू मबिइत धाःगु दु ।
कार्यदलं याःगु सहमतिया प्रस्तावयात निगू हे पक्षया शीर्ष नेतापिन्त न्ह्यब्वया थांै च्वनिगु स्थायी कमटिया मुँज्याय् पेश यायेगु नेतापिन्सं धाःगु दु । कार्यदलं छुं ईनिसें पार्टी ब्वलनाच्वंगु कचवंया हुनिं देययंकया पार्टी ज्यासनामि, समर्थक व शुभेच्छुकपिं अतिकं हे चिन्तित जुयाच्वंगु निष्कर्ष पिकाःगु खः ।
थुकिं नेकपा एमालेया आन्तरिक जीवनय् जक मखुसे देय्या राजनीतिक स्थायित्व, अग्रगति व एकता तकं कजमोर जुइगु खःला धइगु शंका अप्वःयावंगु कार्यदलं न्ह्यब्वःगु सहमतिपत्रय् न्ह्यथनातगु दु ।
