नेकपा एमालेया १०क्वःगु महाधिवेशन आयोजक कमिटीया लिपांगु मुँज्या थौं च्वनेत्यंगु दु ।

मुँज्यां महाधिवेशन आयोजक कमिटीयात विघटन यानाः केन्द्रीय कमिटी मुँज्याया आह्वान यायेगु एमालें न्ह्यथंगु दु ।

केन्द्रीय कमिटी मुँज्या सःतीगु लिसें ९क्वःगु राष्ट्रिय महाधिवेशनं निर्वाचित पदाधिकारी स्वतः पुनर्वहाली जुइगु व माधव नेपाललिसें ११ नेतायात याःगु कारबाही नं स्वतः निष्क्रिय जुइगु जूगु दु ।

म्हिगः च्वंगु स्थायी कमिटी मुँज्यां महाधिवेशन आयोजक कमिटी भंग यासें पार्टीयात २०७५ जेठ २ या अवस्थाय् लित हयेगु निर्णय याःगु खः । वइगु शुक्रबाः एकता न्ह्यःया केन्द्रीय कमिटी मुँज्या सःतेगु निर्णय जूगु दु ।

नेकपा एकता धुंकाः एमालेय् वंपिं माओवादी केन्द्रया नेतात तकं नेकपाय् दुबलय् गुगु जिम्मेवारीइ दुगु खः, व हे जिम्मेवारीलिसें एमाले मुँज्याय् ब्वति काइ । निगूगु तहया नेतातय सहलह व सर्वोच्च अदालतं महाधिवेशन आयोजक कमिटीयात मान्यता मबीधुंकाः पार्टीयात जेठ २ या अवस्थाय् लित हयेत नायः केपी शर्मा ओली सहमत जुयादीगु खः ।

वंगु फागुन २३ गते सर्वोच्च अदालतं एमाले थनेधुंकाः २ जेठ २०७५ या हे पार्टी कमिटी, विधान व नेतृत्व कायम जुइमाःगु माग पार्टी दुने दनाच्वंगु खः ।

Categorized in राजनीति