नेकपा पदाधिकारीपिनिगु सपथग्रहण ज्याझ्वलय् दायादाया ल्वापु
लहना न्यूज | ने.सं. ११३९ ञलाथ्व द्वादशि (१० सेष्टेम्बर, २०१९), मंगलवाः
नेपाल कम्यूनिष्ट पार्टी (नेकपा), प्रदेश २या निगू जिल्लाया पदाधिकारीपिनिगु सपथग्रहण ज्याझ्वलय् दायादाया ल्वापु जूगु दु । बर्दिबासय् च्वंगु सेवा समितिया हलय् सप्तरी व सिरहाया पदाधिकारीपिं दथुइ उकथं ल्वापु जूगु प्रहरीं न्ह्यथंगु दु ।
उगु ल्वापुइ थ्यंमथ्यं बागू दर्जन नेता व कार्यकर्ता घाःपा जूगु दु । घाःपाः जूपिं मध्ये छम्हेसिगु छ्यं तज्याःगु दु ।
सपथ ग्रहण ज्याझ्वः शुरु जुइ न्ह्यः हे नेता व कार्यकर्तातसें नाराबाजी यासें हलदुने च्वंगु मेच तोडफोड याःगु खः । पार्टीया नायः व मूछ्याञ्जें सपथग्रहण ज्याझ्वः स्थगित यायेत निर्देशन ब्यूसां नं नायः प्रभु साहपिन्सं बलजफ्ति यायेत स्वयेवं उकथं ल्वापु जूगु खः । असन्तुष्ट कार्यकर्तातसें नायः प्रभु साहयात हलं पितिनाछ्वःगु खः ।
असन्तुष्ट पुचलं नाराबाजी यासें मेच स्यंकेवं निखेरं ल्वापु जूगु खः । ल्वापुयात नियन्त्रणय् कायेत वःपिं प्रहरीतसें लाठीचार्ज याःगु इलय् नेकपाया सप्तरी नेता देवनाथ यादवया छ्यं तज्याःगु खः । यादव प्रदेश कमिटीया दुजः खः । अथे हे, सप्तरीया युवा नेता मधुसुदन यादवया तुतिइ घाः जूगु दु । आः नेकपाया प्रदेश स्तरीय नेतापिंं सुरक्षा घेराय् दु ।
जिल्ला कमिटीइ गबलें. हे दुजः मजूम्ह मनूयात जिल्ला दुजः दयेकूगु धासें सप्तरी, सिरहालिसेंया प्रदेश २ या च्यागुलिं हे जिल्लाय् विवाद ब्वलंगु खः । पुलांम्ह मन्त्री उमेश यादवं नेतातसें थः चालक, भान्सेयात नं दुजः दयेका पदाधिकारी दयेकूगु धयादीगु दु ।
थुगु विवाद मज्यंकूसे सपथग्रहण याकेत्यंगुलिं नेता व कार्यकर्तात न्हापा हे असन्तुष्ट जुयाच्वंगु खः ।
यादवं सप्तरीया सपथग्रहण सप्तरीइ हे यायेमाःगुली महोत्तरीइ याकूगुया छुं हे तुक मदुगु धयादीगु दु ।
आः पार्टीया प्रदेश नेता सुमनराज प्याकुरेल व महेन्द्र पासवानं निगुलिं पक्षलिसे खँल्हाबँल्हा यानाच्वंगु दु ।
महोत्तरीया बर्दिवासय् च्यागुलिं जिल्लाया पदाधिकारीपिनिगु सपथग्रहण यायेगु ज्याझ्वः क्वःछिनातःगुली थौं मंगलवाः सप्तरी व सिरहाया पदाधिकारीपिनिगु जक सपथग्रहण ज्याझ्वः तयातःगु खः ।
Categorized in राजनीति
