कप्तान पारस खड्काया उत्कृष्ट कमब्याकया नापनापं टी–२० विश्वकपया एशियाली ल्यज्या कासाय् कुबेत विरुद्ध नेपालं ७गू विकेटं बुकल । १४२गू रनया आज्जु पूवंकेगु झ्वलय् नेपाः त्याःगु उगु कासाय् पारसं ६८गू रन दयेकूगु खः । खड्कां ३२गू बलय् ११गू चौका व १गू छक्का थ्वानाः ‘हाफ सेन्चुरी’ पूवंकूगु खः ।

 

कतार विरुद्धया कासाय् जँ स्याःगुलिं पारसं मलेसिया विरुद्धया कासा त्वःफिकेमाःगु खः । नेपालं आज्जु ३गू विकेटया खतिइ कासा क्वचाइगु २५गू बल न्ह्यः हे पूवंकल ।

 

शरद भेषवाकरं अविजित ३८गू रन दयेकल । वय्कलं ४गू चौका व १गू छक्का थ्वाःगु खः । उपकप्तान ज्ञानेन्द्र १९गू व दीपेन्द्रसिंह ऐरी १गू रनय् आउट जुल । थ्व स्वयां न्ह्यः सिंगापुरया इण्डियन एकेदेमिया कासाख्यलय् टस त्याकाः नेपालं फिल्डिङ्ग कुबेतया शीर्ष व मध्यक्रमया ब्याटिङ्ग लाइन ध्वस्त यायेत बसन्त रेग्मी व सन्दीप लामिछानें उत्कृष्ट योगदान ब्यूगु खः । बसन्तं २०गू रन बियाः ३गू विकेट काःगु खःसा सन्दीपं २१गू रन बियाः ३गू विकेट हे काःगु खः ।

 

थ्व स्वयां न्ह्यः कुबेतं क्वःछिनातःगु ओभरय् ९गू विकेटया खतिइ १४१गू रन दयेकूगु खः । कुबेतया नितिं कप्तान मोहम्मद कासिफं अविजित ४९गू रन दयेकूगु खःसा अन्दन इद्रिसं २५गू व मोहम्मद अस्लमं २३गू रन दयेकूगु खः ।

 

कुबेत विरुद्धया कासा त्याकेधुंकाः नेपाः ल्याः धलखय् निगूगु थासय् थहां वंगु दु । एशियाली ल्यज्याया लिपांगु कासाय् नेपालं कन्हय् आइतवाः सिंगापुरलिसे धेंधेंबल्ला याइ । ग्लोबल ल्यज्याय् थाय् दयेकेत नेपालं उगु कासा त्याके हे माःगु दु । सिंगापुर कासाया छगू जक अपराजित पुचः खः ।