न्हापांगु टि–२०इ नेपालं मलेसियायात ७गू विकेटं बुकूगु दु । थ्व लिसें निगू म्याचया सिरिजय् नेपाः १–० ल्याखं न्ह्यःने लाःगु दु ।

 

किनरारा ओभलय् मलेसियां न्ह्यब्वःगु १२९गू रनया लक्ष नेपालं ९गू बल ल्यंदनीगु इलय् ३गू विकेटया खतिइ प्राप्त यात । पारस खड्का व प्रदीप ऐरी ओपनिङय् वःगु खःसा प्रदीप म्हो रनय् हे आउट जुल । ज्ञानेन्द्र मल्ल ७गू व रोहितकुमार पौडेलं ५गू रन जक दयेकेफूगु खः ।

 

अथे खःसां कप्तान पारस खड्कां मुक्कं ५०गू बलय् ८गू चौका व ५गू छक्काया ग्वाहालिइ अविजित ८६गू रन दयेकल । प्यंगूगु विकेटया नितिं खड्कां शरद भेषवाकरलिसे ६१गू रनया साझेदारी यात । शरद भेषवाकर १६गू रनय् अविजित जुल ।

 

थ्व स्वयां न्ह्यः टस त्याकाः न्हापां ब्याटिङ याःगु मलेसियां २०गू ओभरय् ९गू विकेटया खतिइ मुक्कं १२८गू रन दयेकूगु खः । उकिया नितिं भीरनदीप सिंहं ५७गू रन दयेकूगु खःसा अहमद फैजं ४५गू रन दयेकल । निम्हेस्यां स्वंगूगु विकेटया नितिं ५०गू रनया साझेदारी याःगु खः । मेमेपिं ब्याट्सम्यानं खास हे रन दयेके मफूगु खः । उकी न्याम्ह ब्याट्सम्यान ला शून्यय् हे आउट जूगु खः ।

 

मलेसियायात म्हो रनय् कयेच्यायेगु नितिं करण केसीं ३गू विकेट काःगु खःसा सन्दीप लामिछाने व बसन्त रेग्मीं २/२गू विकेट व सोमपाली कामीं १गू विकेट काःगु खः ।