नेपालया राष्ट्रिय निकुञ्जय् थ्व हे मङ्सिर १९ गतेनिसें धुँ गणना याइगु जूगु दु ।

गणनाया शुभारम्भ चितवन राष्ट्रिय निकुञ्जं जुइ । राष्ट्रिय निकुञ्ज तथा वन्यजन्तु संरक्षण विभागं गणनाया नेतृत्व याइ । देय्न्यंकया न्यागू निकुञ्जय् धुँ दु । चितवन, बर्दिया, पर्सा, शुक्लाफाँटा व बाँके राष्ट्रिय निकुञ्ज अले जःखःया वन क्षेत्रय् धुँया गणना यायेत्यंगु खः ।

चितवन राष्ट्रिय निकुञ्जया प्रमुख संरक्षण अधिकृत हरिभद्र आचार्यया कथं हिउँदया इलय् धुँ लँय् वइगु जूगुलिं थुगु ई गणनाया लागिं पाय्छि नाली । झाः गनावनेधुंकाः धुँ घाँय्या मैदानय् च्वनीगु जुयाः गणना थाकुइगु जूगुलिं ख्वाउँगु मौसम ल्यःगु खः ।

पुस दुने क्वचायेकेगु कथं धुँ गणना यायेगु तयारी जूगु दु । क्याप्चर रिक्याप्चड विधिं धुँ गणना याइ । निगू÷निगू ग्रिड अर्थात चार वर्ग किलोमिटरय् छज्वः क्यामेरा तयाः गणना याइ । चितवन व पर्सालाई छगू, बाँके व बर्दियायात निगूगु व शुक्लाफाँटा अले लिक्कया लालझाडी क्षेत्रया स्वंगूगु कम्प्लेक्स दयेकाः ज्या यायेत्यंगु खः ।

सन् २०१८य् याःगु धुँ गणनाय् नेपालय् २सः व ३५ वयस्क धुँ लूगु खः । व इलय् चितवनय् ९३, बर्दियाय् ८७, पर्साय् १८, शुक्लाफाँटाय् १६ व बाँकेय् २१ धुँ लूगु खः । थ्व ल्याः अप्वःगु अनुमान दु ।

सन् २०१०य् रसियाया सेन्ट पिटर्सवग जूगु धुँ दइगु १३ देय्या राष्ट्र प्रमुखया धुँ सम्मेलनय् नेपालं सन् २०२२ तक्कय् धुँया धुँया ल्याः २सःत्या थ्यंकेगु प्रतिबद्धता प्वंकूगु खः ।

Categorized in राष्ट्रिय