नेपाःया न्हापांम्ह नृत्यगुरु थापायात हन
लहनान्यूज | चिल्लागा दशमी ११३७ (मार्च २३ २०१७)
नेपाःया दक्कले न्हापांम्ह नृत्य निर्देशक भैरवबहादुर थापायात थौं येँय् तःजिक हंगु दु ।
नृत्य निर्देशक संघ नेपालं थौं येँया राष्ट्रिय नाचघरय् ‘नृत्य गुरुबा भैरवबहादुर थापा सम्मान साँझ २०७३ तथा सांस्कृतिक कार्यक्रम’या ग्वसाः ग्वयाः नृत्यगुरु थापायात हंगु खः । ज्याझ्वलय् संघया नायः भुवन श्रेष्ठं थापायात दोसल्लां न्ययेकादिल सा शताब्दि पुरुष डा. सत्यमोहन जोशीं हनापौ लःल्हानादिल ।
सांस्कृतिक संस्थान राष्ट्रिय नाचघरया महाप्रबन्धक राजेश थापां नगद सम्मान २५द्वः सछि व छतकाया चेक सम्मानित नृत्यगुरु थापायात लःल्हानादिल ।
हना लःल्हाना कायेधुंकाः सम्मानित थापां थःगु हे नामं ज्याझ्वः यानाः थुकथं हंगुलिइ थः तसकं लय्ताःगु धयादिल । लिसें कलाकार लिसें कला ख्यःया उत्थानया नितिं कलाकारत संगठित जुयाः माःथाय् सः तयेमाःगु धयादिल ।
संस्कृतिविद् सत्यमोहन जोशीं कलाकारया नामय् चालाच्वंगु सरकारी निकाय व संघसंस्थां कलाकारयात हे प्राथमिकता व थाय् बीमाःगु खँय् बः बियादिल । सांस्कृतिक संस्थानया महाप्रवन्धक राजेश थापां राष्ट्रिय नाचघरया दबू कलाकारया नितिं न्ह्याबलें चालाच्वंगु दुगु व दयाच्वनीगु प्रतिवद्धता प्वंकादिल ।
हनाया झ्वलय् नृत्यगुरु थापाया कला ख्यलय् संघर्ष व योगदान बिषयस जानकारीमूलक भिडियो प्रोफाइल नं क्यंगु खः । उगु हे ज्याझ्वलय् नृत्य निर्देशक संघपाखें पिथंगु बि.सं. २०७४या क्यालेन्डरया विमोचन नृत्यगुरु भैरवबहादुर थापा, संघया नायः भुवन श्रेष्ठ, न्हापांम्ह न्वकू संजय राजोपाध्यायं मंकाः रुपं यानादिल ।
व स्वयां न्ह्यः ज्याझ्वःया मू पाहां शताब्दि पुरुष संस्कृतिविद् डा. जोशीं त्वाःदेवाय् मत च्याकाः हना ज्याझ्वःया उलेज्या यानादिल । संघया न्हापांम्ह न्वकू व हना ज्याझ्वः कजि संजय राजोपाध्यायं लसकुस न्वचु ब्युसें राज्यं कलाकारयात देय्या तिसा मधासे राज्यया छगू अंगया रुपय् हे परिभाषित यायेमाःगु माग तयादिल ।
हना ज्याझ्वः धुंकाः थीथी कला सम्वद्ध संघसंस्थापाखें थीथी नेपाली लोक, चर्या प्याखंया नापं हिपहप, साल्सा लिसेंया हुलाप्याखं न्ह्यब्वःगु खः ।
Categorized in मनोरन्जन
