नेपाःया मिसा फुटबल टोलीं थौं बंगलादेशलिसे मैत्रिपूर्ण कासा म्हितिइगु
ञंलाथ्व तृतीया ११४१, भाद्र २४ बिहीवाः
नेपाःया राष्ट्रिय मिसा फुटबल टिमं थौं बंगलादेशलिसे मैत्रिपूर्ण कासा म्हितेत्यंगु दु ।
येँया दशरथ रंगशालाय् थौं सनिलय् ५ ता इलय् कासा न्ह्यायेत्यंगु दु । नेपाः लिसे निगू मैत्रिपूर्ण कासाया नितिं बंगलादेशया मिसा फुटबल टोली वंगु सोमबाः नेपाः थ्यंकावःगु खः ।
बंगलादेश विरुद्धया कासा नेपाःया मिसा राष्ट्रिय टोलीया नितिं दशरथ रंगशालाय् न्हापांगु कासा जुइ । सिनियर राष्ट्रिय टोलीं आःतक्क दशरथ रंगशालाय् म्हितुगु मदुनि ।
टोलीया मू फरवार्ड सावित्रा भण्डारी चोटया हुनिं वासः याकाच्वंगु दु । थुगु अवस्थाय् टोलीया सुरुवाती एघारय् लायेत तसकं प्रतिस्पर्धा दु । विदेशी प्रशिक्षक ग्यारी फिलिप्सं तयार याःगु टोलीया ७म्ह कासामि राष्ट्रिय टिमय् डेब्यु यायेगु तयारीइ दु ।
उज्वेकिस्तानय् जुइगु एएफसी मिसा एसिया कप फुटबल छनोटया तयारी स्वरुप नेपालं बंगलादेशलिसे अभ्यास कासा म्हितेत्यंगु खः ।
Categorized in कासा
