नेपाःया स्वीमर अलेक्स शाहं थौं धेंधेंबल्ला याइगु
दिल्लागा चतुर्थी ११४१,साउन १२ मंगलवाः
टोकियो ओलम्पिकय् नेपाःया स्वीमर अलेक्जेण्डर शाहं थौं प्रतिस्पर्धा याइगु जुगु दु।
वय्कलं मिजंपाखेया स्वीमिङ सछि मिटरया फ्रिस्टाइलय् धेंधेंबल्ला यायेत्यंगु खः । धेंधेंबल्लाया न्हापांगु हिट लिस्टय् दुम्ह अलेक्सया कासा नेपाली ई कथं थौं न्हिनय् जःछिपाः ४ताः ईलय् जुइ ।
थ्व हिटय् नेपाःलिसे भुटान, माल्दिभ्स, कोसोभो, गुयाना, सोलोमन आइल्याण्ड व प्यालेस्टाइनया कासामित दु । टोकियो ओलम्पिकय् स्वीमिङपाखे नेपाःया निम्ह कासामिपिन्सं ब्वति काःगु दु ।
अलेक्सलिसे मिसा सछि मिटर फ्रिस्टाइलय् गौरिका सिंहं धेंधेंबल्ला याइ । ५दँ न्ह्यः रियो ओलम्पिकय् ब्वति काःम्ह गौरिका निक्वः तक अोलम्पिक म्हितूम्ह नेपामि जूगु दु ।
Categorized in कासा
