नेपाः एसिसी यू–१९ इस्टर्न रिजन क्रिकेट कासाया फाइनलय्
लहना न्यूज | ने.सं.११३९ दिल्लाथ्व षष्ठि (८ जुलाइ, २०१९), सोमवाः
नेपाः एसिसी यू–१९ इस्टर्न रिजन क्रिकेट कासाया फाइनलय् दुहां वंगु दु ।
थौं सोमवाः जूगु सेमीफाइनलय् घरेलु पुचः मलेसियायात ७गू विकेटं बुकूसें नेपाः उपाधि लिक्क थ्यंगु खः ।
क्वालालम्पुरय् च्वंगु किनरारा ओभलय् टस त्याकाः नेपालं फिल्डिङ ल्ययेवं मलेसियां न्हापां ब्याटिङ याःगु खः । मलेसियां ब्यूगु ८८गू रनया सामान्य लक्ष नेपालं १५.५गू ओभरय् ३गू विकेटया खतिइ प्राप्त यात ।
नेपाः त्याःगु उगु कासाय् कप्तान रोहितकुमार पौडेलं नटआउट ३१गू रन व भीम सार्कीं नटआउट ३३गू रन दयेकूगु खः । रोहितं २९गू बलय् २गू चौका व १गू छक्का थ्वाःगु खः । भीमं ३४गू बलय् २गू चौका व १गू छक्का हे थ्वाःगु खः । ओपनर पवन सर्राफ १८गू रनय् आउट जुल । वय्कलं १६गू बलय् १गू चौका व २गू छक्का थ्वाःगु खः । अथे हे थ्व स्वयां न्ह्यःया कासाय् शतक थ्वाःम्ह रीत गौतम ३गू व खडक बहादुर शून्य रनय् आउट जुल ।
बलिङय् मलेसियाया मोहमद खइरं २गू विकेट व मोहमद अमीरं १गू विकेट काःगु खः ।
थ्व स्वयां न्ह्यः न्हापां ब्याटिङ याःगु मलेसिया ४०.५गू ओभरय् ८७गू रनय् अलआउट जुल । मलेसियाया नितिं मोहमद अमीरं दकलय् अप्वः २४गू रन दयेकूगु खः । वय्कलं ३२गू बलय् स्वंगू चौका थ्वाःगु खः ।
बलिङय् नेपाःया सागर ढकालं स्वंगू विकेट काल । सागरं १०गू ओरय् स्वंगू मेडन तसें १६गू रन बिल । कुशल मल्लं २गू विकेट काल । अथे हे कमलसिंह ऐरी, रासिद खन व तिलकराज भण्डारीं छगू छगू विकेट काल ।
आः नेपालं उपाधिया नितिं कन्हय् मंगलवाः हङकङलिसे धेंधेंबल्ला याइ ।
Categorized in कासा
