नेपाः पार्टिया विशेष अधिवेशन जुइगु
लहनान्यूज | चिल्लागा चःर्हे ११३७ (मार्च २७ २०१७)
नेपाः राष्ट्रिय पार्टिं थ्व हे वइगु असार १० गते विशेष अधिवेशन याइगु जूगु दु ।
पार्टिया कार्यवाहक नायः सुवर्णकेशरी चित्रकारया निवासय् थौं च्वंगु केन्द्रिय समितिया मुँज्यां असार १० गते पार्टिया विशेष अधिवेशन यायेगु क्वःछ्यूगु खः । मुँज्याय् नायः चित्रकारं तयादीगु विशेष अधिवेशनया प्रस्ताव सर्वसम्मतिं पारित याःगु खः ।
उगु हे मुँज्याय् संघीय गठबन्धनय् मधेसी मोर्चालिसे जानाः जुयाच्वंगु आन्दोलनया गतिविधियात कयाः सहलह याःगु खः । लिसें मुँज्याय् प्रादेशिक चुनावयात कयाः नं सहलह जूगु खः ।
सरकारं न्हापा प्रादेशिक तहया चुनाव यायेमाःगु अवधारणाय् न्ह्याःवनाच्वनागु जूगुलिं पार्टिपाखें स्थानीय चुनावयात वहिष्कार यायेगु नीतियात लीगु पार्टिया मू छ्यान्जे डा.विजय सैंजुं धयादिल ।
उकिया नापं संविधान संशोधन सहितया परिमार्जन यायेधुंकाः जक स्थानीय चुनावय् ब्वति कायेगु वा मकायेगु धैगुलिइ बिचाः यायेगु मू छ्यान्जे सैंजुं लहनान्यूजयात कनादिल ।
Categorized in राजनीति
