'नेपाः पार्टि सिद्धान्तं प्रेरीत जुइमाः'
नृपेन्द्रलाल श्रेष्ठ | सिल्लाथ्व अष्टमि ११३७ (फेब्रुअरी ४ २०१७)
नेपाः राष्ट्रिय पार्टिया ग्वसालय् ‘समसामयिक नेवाः राजनिति व नेपाः पार्टि’ विषयक अन्तक्र्रिया ज्याझ्वः येँय् क्वचाःगु दु ।
वर्तमान परिवेशय् नेवाः आन्दोलनयात गुकथं न्ह्याकेमाली धइगु विषयस अन्तक्र्रिया जुगु उगु ज्याझ्वलय् पार्टिया पोलिटब्यूरो दुजः सुरेशकिरण मानन्धरं गणतन्त्र, संघीयता व धर्म निरपेक्षता प्राप्त जुइधुंकूगु अवस्थाय् नेवाः आन्दोलन छाय् आवश्यक दनि धइगु खँ तयादिल । मानन्धरं नेवाःतयगु पहिचान सहितया छगू हे जक पार्टि नेपाः पार्टि खः धयादिल ।
नेवाः न्ह्यलुवा मल्ल के सुन्दरं राजनीतिक पार्टि न्ह्याकेगु लागि स्वंगू स सिद्धान्त, सगठनया संरचना व श्रोत आवश्यक खः धयादिल । नेपाः पार्टि सिद्धान्तं प्रेरित मजूगु हुनिं दक्व नेवाःत छथाय् मन्ह्यंगु खँय् आः नेपाः पार्टिं बिचाः याइ धइगु बिश्वास न्ह्यलुवा मल्लं प्वंकादिल । नेवाः न्ह्यलुवाः डा.महेशमान श्रेष्ठं धाःसा नेपाः पार्टि आः नेवाःतयगु भावना कथं न्ह्याःवनाच्वंगु धयादिल ।
ज्याझ्वलय् जनकवि दुर्गालाल श्रेष्ठ, प्रा.सुवर्ण शाक्य, नेवाः जागरण मंचया नायः सुजीव बज्राचार्य, नेपालभाषा मिसा खलःया नायः मंगला कारंजित, पुर्व राष्ट्रिय योजना आयोगया न्वकू डा.रबिन्द्र कुमार शाक्यं थःथःगु नुगः खँ तयादीगु खः ।
नेपाः पार्टिया का.वा. नायः सुवर्णकेशरी चित्रकारया सभाध्यक्षताय् जुगु उगु ज्याझ्वलय् पार्टिया महासचिब डा.बिजय सैंजुं लसकुस यानादीगु खः ।
Categorized in राजनीति
