नेपाः व भारत दथुया निगूगु मैत्रीपूर्ण कासाय् नेपाल बुत
गुंलागा त्रयोदशी ११४१, भाद्र २१ सोमबाः
निगूगु अन्तराष्ट्रिय मैत्रीपूर्ण फुटबलय् नेपाल भारतलिसे बूगु दु । दशरथ रंगशालाय् म्हिगः जूगु निगूगु मैत्रीपूर्ण कासाय् भारतं नेपालयात २–१ गोल अन्तरं बुकूगु खः ।
भारतयात त्याकेत कप्तान सुनिल क्षेत्री नायक जुल । वय्कलं छगू गोल यायेगुया लिसें मेगु छगू गोलया ह्वःताः दयेकल । नेपालया तेज तामाङं १ गोल लितबिल । कासाया ६२गूगु मिनेटय् फारुख हाजी चौधरीया गोलय् भारतं अग्रता दयेकूगु खः ।
भारतीय डिफेन्डर चिन्गलेनसाना सिंह कोन्शामया क्रसय् सुनिल क्षेत्रीं हेडमार्फत डिबक्स दुने ब्यूगु बलय् चौधरीं गोल याःगु खः । कासाया ८०गूगु मिनेटय् कप्तान क्षेत्रीं गोल यासें भारतया अग्रता निदुगं दयेकल ।
गोलया लागिं हथाय् चायाच्वंगु नेपाली टिमया काउन्टरय् क्षेत्रीं भारतया लागिं निगूगु गोल याःगु खः । कासा क्वचाये ५ मिनेट न्ह्यः तेजं नेपालपाखें १ गोल यात । राष्ट्रिय फुटबल टिमय् तेजं न्हापांगु अन्तराष्ट्रिय गोल यायेत ताःलाःगु खः ।
साफ च्याम्पियनसिपया तयारीइ दुगु नेपालं भारतयात मैत्रीपूर्ण फुटबलया लागिं सःतूगु खः । भारतविरुद्ध निगू मैत्रीपूर्ण फुटबल म्हिताः साफया लिपांगु तयारीइ जायेगु नेपालया योजना दु । बिहिबाः जूगु न्हापांगु मैत्रीपूर्ण कासाय् नेपाल व भारतं १–१ गोलया ज्वलिंज्वः म्हितूगु खः ।
Categorized in कासा
